तिन दल बीच सहमति, संसद अवरोध खुल्ने

Saturday May 27, 2017
वि.सं.२०७४ जेठ १३ शनिवार ०७:२८

१३ जेठ, काठमाडौँ– व्यवस्थापिका संसदमा प्रमुख प्रतिपक्षी दल नेकपा एमालेले जारी राखेको अवरोध खुल्ने भएको छ । सभामुख ओनसरी घर्तीको पहलमा भएको शीर्ष तीन दलको बैठकमा सहमति जुटेपछि आजदेखि संसदको नियमित प्रक्रिया अघि बढ्ने भएको हो ।
सहमतिबारे जानकारी दिँदै सभामुख ओनसरी घर्तीले भनेकी छिन्, ‘अन्ततः सहमति गराउने मेरो प्रयास सफल भयो, संसद खुल्ने भयो,नेताज्युहरुलाई धन्यवाद छ।’
सिंहदरबारस्थित सभामुखको कार्यकक्षमा भएको शीर्ष नेताहरूको बैठकमा प्रमुख प्रतिपक्षी दल नेकपा एमालेले उठाएको मागहरु वैशाख ३१ को पहिलो चरणको निर्वाचनमा विभिन्न ठाउँमा भएका धाँधलीबारे संसदीय छानबिन समिति गठन गर्न, प्रधानन्यायाधीशमाथि लगाइएको महाअभियोगको प्रस्ताव फिर्ता गर्न र टिकापुर घटनाका दोषीलाई उन्मुक्ति नदिन सत्तापक्ष सहमत भएपछि संसद बैठक अघि बढाउने सहमति भएको हो ।
बैठकमा सहभागी नेकपा एमालेका नेता माधवकुमार नेपालले आफ्नो पार्टीको माग सम्बोधन गर्न सत्तापक्ष तयार भएकाले आजैदेखि संसद्को बैठक सुचारु हुने बताए ।
उनले राष्ट्रिय सहमतिको सरकार गठन गर्ने विषयमा पनि छलफल भएको बताए ।
नेकपा माओवादी केन्द्रका नेता नारायणकाजी श्रेष्ठले दोस्रो चरणको स्थानीय निर्वाचन सुनिश्चित गराउन र सरकारको नीति तथा कार्यक्रम पारित गराउनलगायत विषयमा प्रमुख तीन दलका शीर्ष नेताबीच सहमति भएको जानकारी दिए ।
बैठकमा प्रधानमन्त्री पुष्पकमल दाहाल ‘प्रचण्ड’, नेपाली काँग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीबीच सहमतिका साथ अघि बढ्ने समझदारी भएको थियो ।
सरकारले तराई–मधेसका जिल्लाहरुमा स्थानीय तहको संख्या थप गरेको विरोधमा प्रमुख प्रतिपक्षी दलले तीन दिनदेखि संसद चल्न दिएको थिएन ।
सरकारले उक्त निर्णय राजपत्रमा प्रकाशित गरे पनि हिजो मात्र सर्वोच्च अदालतले सरकारलाई सो निर्णय कार्यान्वयन नगराउन अन्तरिम आदेश जारी गरेको थियो ।
सभामुखले हिजो पनि शीर्ष दलहरुको बैठक बोलाएकी थिइन् तर हिजोको बैठकमा शीर्ष दलका नेताहरु उपस्थित नभएपछि बैठक बस्न सकेको थिएन ।