विद्यालयमा आगजनि हुदा दुई करोड बढिको क्षति

Tuesday May 30, 2017
वि.सं.२०७४ जेठ १६ मंगलवार १३:४५

उत्तम चौलागाँई/ १६ जेठ, खोटाङ- अज्ञात समूहले खोटाङको एक विद्यालयमा आगजनी गरेको छ । जिल्लाको उत्तरी क्षेत्रमा पर्ने जालपास्थित ज्योति माविमा गएराति आगजनी भएको छ ।
रुपाकोट मझुवागढी नगरपालिका–१२ जालपाको ज्योति माविमा गएराति करिब १२ बजेको समयमा आगजनी भएको हो ।
मध्यरातमा भएको आगजनीबाट विद्यालयको नौवटा कक्षा कोठा, कार्यालय, कागजपत्र, पुस्तकालय, फर्निचर लगायतका सामग्री जलेर नष्ट भएको प्रधानाध्यापक टिकाबहादुर श्रेष्ठले बताए ।
जिल्लाको नमूना मानिएको विद्यालयमा आगजनी हुँदा साढे दुई करोड भन्दा बढीको क्षति भएको प्रहरीले जनाएको छ ।
विद्यालयमा किन आगजनी गरियो भन्ने खुल्न नसकेको विद्यालय व्यवस्थापन समितिका अध्यक्ष प्रतिमान राईले जानकारी दिए । आगलागीबारे अनुसन्धान गर्न जिल्ला प्रहरी कार्यालयबाट प्रहरी नायव उपरीक्षक नवीनकिशोर प्रधानको टोली घटनास्थल पुगेको छ ।
विद्यालयमा भएको आगलागी अज्ञात समूहले सुनियोजित तरिकाले गरेको हुनसक्ने स्थानीयको अनुमान छ । घटनाको प्रकृति हेर्दा पेट्रोल छर्केर आगजनी गरेको हुनसक्ने अनुमान गरिएको घटनास्थल पुगेका जिल्ला शिक्षा अधिकारी ज्ञानमणि नेपालले बताए ।
कारोवार दैनिकमा समचार छ ।