४ साउन काठमाडौं – मलेसियामा भएको सारावाक चिफ मिनिस्टर बोर्नेओ कप तेक्वान्दोमा नेपाली तेक्वान्दोले एक स्वर्ण र एक रजत हात पारेको छ । मलेसियाको कुचिङमा मंगलबार भएको अन्तर्राष्ट्रिय तेक्वान्दोको फाइटतर्फ नेपालका पुजन खड्काले स्वर्ण र शिवहरि श्रेष्ठले रजत पदक हात पारेका छन् । नेपाल टोलीले बेस्ट स्पोर्टस् म्यानसिप अवार्डसमेत हात पारेको छ ।

फाइटको क्याडेट ४५ केजीमा पुजनले क्वाटरफाइनलमा मलेसिया,सेमिफाइनलमा इन्डोनेसिया र फाइनलमा सिंगापुरलाई हराउँदै स्वर्ण दिलाएका थिए । क्याडेट ४८ केजीमा शिवहरीले क्वाटरफाइनलमा अस्ट्रेलिया र सेमिफाइनमा मलेसियालाई हराउँदै स्वर्णका लागि प्रतिस्पर्धा गरेका थिए । यद्यपि, फाइनलमा इन्डोनेसियासँग पराजित भएपछि रजत पदकमै सीमित भए ।

अस्ट्रेलियन कम्पनी रेस्ट्रोलोजीको सहयोगमा अन्तर्राष्ट्रिय तेक्वान्दोमा सहभागिता जनाएको नेपालका लागि प्रविन तामाङ क्वाटरफाइनलमा चाइनिज ताइपेईका खेलाडीसँग स्तब्ध भएपछि पदकविहिन भए । फाइटतर्फ पुरुष जुनियर ५५ केजी तौल समूहमा खेलेको तामाङले प्री–क्वाटरमा मलेसियालाई हराएका थिए ।