भदौ १४ र १५ गते आयोजना गरिएको बहुपक्षीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को चौथो शिखर सम्मेलनका लागि आजबाटै विशिष्ट पाहुना नेपाल आउनेक्रम सुरु भएको छ । जसले त्रिभुवन अन्तराष्ट्रिय विमानस्थल आजदेखि शनिबारसम्म प्रभावित हुने भएको छ ।

नेपाल नागरिक उड्डयन प्राधिकरणका अनुसार हरेक राष्ट्रप्रमुख या सरकार प्रमुखको आवागमनका समयमा कम्तिमा आधा घन्टा विमानस्थल बन्द हुनेछ । सम्मेलनको लागि सरकारले सुरक्षा व्यवस्था पनि कडा पारेको छ । यसपटकको सम्मेलमा सुरक्षाको कमान्ड नेपाली सेनाले गर्ने भएको छ ।

सरकारले सेनाको कमान्डमा सम्मेलन सुरक्षाका लागि सम्पूर्ण सुरक्षा संयन्त्र प्रयोग गर्ने योजना बनाएको हो । सेनाकै सुरक्षा योजना अनुसार अन्य सुरक्षा एजेन्सी परिचालित हुनेछन् । सबै सुरक्षा निकायका करिब १७ हजार सुरक्षाकर्मी खटिने बुझिएको छ ।

यसका साथै सरकारले सम्मेलनलाई लक्षित गर्दै काठमाडौं उपत्यकाका विभिन्न स्थानहरुलाई झकिझकाउ बनाएको छ

बिम्स्टेकको पूर्वसन्ध्यामा सचिवस्तरीय बैठक बस्दै
बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) सदस्य राष्ट्रहरुका विदेश मन्त्रालयका सचिवस्तरीय बैठक अहिले बिहान काठमाडौंमा बसिरहेको छ । नेपालमा आयोजना गरिएको चौथो शिखर सम्मेलनको तयारीका लागि सम्मेलनको पूर्वसन्ध्यामा बैठक बसिएको हो ।

परराष्ट्र मन्त्रालयका अनुसार बिम्स्टेक राष्ट्रका विदेश सचिव काठमाडौं आइपुगेको र सचिवस्तरीय १९ औं बैठक आज भएको हो । मन्त्रालयका अनुसार बैठकमा शिखर सम्मेलनका विषय, सिफारिस गर्ने विषयगत क्षेत्र र यसअघिका उपलब्धिको पुनरावलोकन तथा कार्यान्वयनको प्रगति समीक्षा सम्बन्धमा छलफल हुनेछ ।

यस्तै, बिम्स्टेकलाई प्रभावकारी र परिणाममुखी बनाउने, सहयोगका क्षेत्रलाई प्राथमिकताका आधारमा र समूहीकृत गर्ने, संस्थागत सुधार सुदृढिकरणलगायत विषयमा समेत छलफल र परामर्श हुने बताइएको छ । परराष्ट्रका अनुसार सचिवहरुको बैठकपछि भदौ १३ गते सदस्य राष्ट्रका परराष्ट्ररविदेश मन्त्रिस्तरीय बैठक हुनेछ भने भदौ १४ र १५ गते राष्ट्राध्यक्षरसरकार प्रमुखको शिखर सम्मेलन हुनेछ ।