नेपाल प्रहरीले कञ्चनपुरकी १३ वर्षीया बालिका निर्मला पन्तको जबर्जस्ती करणीपछि हत्या भएको सम्बन्धमा सङ्कलित डिएनएन नमूना परीक्षण राष्ट्रिय विधि विज्ञान प्रयोगशालामा समेत भएको जनाएको छ ।

प्रहरी प्रवक्ता शैलेश थापाका अनुसार कञ्चनपुर भीमदत्त नपा–२ उल्टाखामकी पन्तको हत्या भएको सम्बन्धमा जिल्ला प्रहरी कार्यालय कञ्चनपुरका तत्कालीन प्रहरी उपरीक्षक डिल्लीराज विष्ट, उनका छोरा किरणराज र स्थानीय आयुष विष्टबाट सङ्कलिन डिएनए विधि विज्ञान प्रयोगशाला र नेपाल प्रहरीको केन्द्रीय विधि विज्ञान प्रयोगशालामा परीक्षण गरिएको बताए ।

 

डिएनए परीक्षणका सम्बन्धमा फरक आशयका साथ समाचार आएपछि प्रहरीको तर्फबाट थप स्पष्ट पार्दै शिक्षा, विज्ञान तथा प्रविधि मन्त्रालय मातहतको निकायबाट समेत परीक्षण भएको जनाएको हो ।

 

तीन जनाको परीक्षण नेगेटिभ आएपछि प्रहरीले अहिले थप परीक्षण भएको बताएर फेरि फसेको छ ।

 

प्रहरीले विभिन्न ठाउँमा परीक्षण गरेको भए पहिले नै भन्न सक्ने थियो । भनेन । यसले गर्दा यदि प्रहरीले फरक फरक ठाउँमा परीक्षण गरेको भए पनि अहिले खुलाउँदा थप फसेको छ ।

किनकि प्रहरीले लगातार ढाँट्दै आएको छ ।

 

निर्मला पन्तको बलात्कारपछि हत्या भएको सन्दर्भमा त्यति नै बेला प्रमाणहरु नष्ट गरिएका थिए । प्रमाण नष्ट गर्दैगर्दाका तस्वीरहरु सार्वजनिक भएकै हुन् ।

 

प्रहरीले तत्कालीन प्रहरी उपरीक्षक डिल्लीराज विष्टको सरुवा गरेकै हो । अनि प्रहरी प्रमुख सर्वेन्द्र खनाल कञ्चनपुर पुगेरै नेतृत्वको नालायकी भनेकै हुन् ।

 

यी कुराहरुलाई आधार बनाउँदा प्रहरीभित्रबाटै गद्दारी भएकै छ । होइन भने यसको छिनोफानो प्रहरीले गर्ने नै थियो ।

प्रहरी नेतृत्वले पटक यो काण्डमा आफ्नो खुट्टामा बञ्चरो हान्ने काम गरेको छ ।

 

नेकपाभित्रै शंका बढ्यो 
नेकपाको मन्त्रिमण्डल एक हतासको मानसिकता लिएर अगाडि बढेको छ । जसले गर्दा गृहमन्त्री रामबहादुर थापा बादलले संसदमा गएर निर्मला काण्डबारे अर्कै बोल्दै आएका छन् भने बाहिर हुने कार्यक्रममा समय आएपछि निर्मलाको प्रतिवेदनबारे बोल्ने बताएका छन् ।

 

ठूलो रकम खर्चेर तयार पारिएको प्रतिवेदन उनलाई लुकाउन पक्कै हैन । तर उनले समय आएपछि खोल्छु भन्नुको कारण के हो ? फेरि के को दवावमा परे उनी ?

 

त्यसो त उनले आफू घेराबन्दीमा परेको बताएका छन् । विपक्षीले घेराबन्दी पार्न जनमत छैन । घेराबन्दी आफ्नैले पार्ने हुन् । तसर्थ नेकपाभित्रबाटै बादललाई दवाव आएकै हो त ?

 

अनि प्रधानमन्त्री एवं नेकपाका अध्यक्ष केपी शर्मा ओलीले अमेरिका भ्रमणकै क्रममा भने निर्मलाको बलात्कारपछि भएको हत्याकाण्डको हत्यारा पत्ता लाग्न १२ वर्षसम्म पनि लाग्न सक्छ ।

 

यसरी देशको अभिभावकले विदेशमा गएर ‘जोक’ गर्नु हुँदैनथ्यो । यो गम्भीर विषय हो । मुलुक बलात्कार र हत्याले आक्रान्त छ । अहिले अरु सबै कुरा छाडेर सुसज्जित समाज बनाउन लाग्नुपर्ने हो ।

 

चेतना दिन लाग्नुपर्ने हो । तर प्रधानमन्त्रीले ख्यालठट्टा जस्तो गरिदिए । पीडितलाई उनको भनाईले कति गहिरो चोट लाग्छ होला भनेर पनि ख्याल गरेनन् ।

 

गृहमन्त्रीको घेराबन्दी र प्रधानमन्त्रीको १२ वर्षमा त खोलो पनि फर्किने समय दिएर कतै यो घटनामा नेकपा नराम्ररी फस्यो भन्ने संकेत त हैन ?