मुख्य खबर

डेंगीको प्रकोपबाट पर्यटन क्षेत्रमा पर्ने प्रभाव न्यूनीकरणका लागि निर्देशन, जहाजभित्र औषधि छर्किने व्यवस्था मिलाउनु : योगेशकुमार भट्टराई

  • Avatar
    Aarthik

    २०७६ भाद्र ३० गते, सोमबार १३:५५ मा प्रकाशित

काठमाडौं । संस्कृति, पर्यटन तथा नागरिक उड्डयनमन्त्री योगेशकुमार भट्टराईले ‘नेपाल भ्रमण वर्ष २०२०’ का सन्दर्भमा डेंगीको प्रकोपबाट पर्यटन क्षेत्रमा पर्ने प्रभाव न्यूनीकरणका लागि निर्देशन दिएका छन् । लामखुट्टेको टोकाइबाट सर्ने डेंगीबाट पर्यटन क्षेत्रमा पर्ने प्रभाव र यसको निराकरणका विषयमा सोमवार मन्त्रालयमा सरोकार भएका निकायसँग छलफल गर्दै उनले डेंगीले पर्यटनमा पर्न सक्ने असर निराकरणका लागि आवश्यक तयारी तथा पूर्वसर्तकता अपनाउन निर्देशन दिएका हुन् ।

उनले नेपाल नागरिक उड्डयन प्राधिकरणबाट सबै विमानस्थल सफा राख्ने तथा उडानपूर्व जहाजभित्र तोकिएको मापदण्डअनुसार औषधि छर्किने व्यवस्था मिलाउन पनि निर्देशन दिएका छन् । साथै नेपाल होटल संघ, रेष्टुरेन्ट व्यवसायी संघ, पर्यटक यातायातलगायत पर्यटकीय सेवा दिने विभिन्न निकायले आफ्नो क्षेत्र सफा राख्ने, पर्यटकलाई सूसुचित गर्ने तथा औषधिकोसमेत मापदण्डअनुरुप गर्न गराउन मन्त्री भट्टराईले निर्देशन दिएका मन्त्रालयद्वारा जारी विज्ञप्तिमा उल्लेख छ ।

मन्त्री भट्टराईले डेंगीबारे राष्ट्रिय तथा अन्तरराष्ट्रियरुपमा सही सूचना शीघ्र प्रवाह गरी यसको असर न्यूनीकरण गर्नुपर्नेमा जोड दिए । उनले खुला क्षेत्र रहेका तथा पर्यटकको बढी उपस्थिति रहने पशुपति, लुम्बिनी, जनकपुर, पोखरा एवं सौराहालगायतका पर्यटकीय क्षेत्रमा सरसफाइ अभियान चलाउन निर्देशन दिए । यसैगरी राष्ट्रिय तथा अन्तरराष्ट्रियरुपमा यससम्बन्धी तथ्यपूर्ण सूचना सम्प्रषेण गरी नेपालको पर्यटन क्षेत्रमा यसको असर पर्न नदिन तथा अन्तरराष्ट्रिय जगतमा पर्यटकीय दृष्टीले नेपाल पूर्ण सुरक्षित रहेको सन्देश प्रवाह गर्न नेपाल पर्यटन बोर्डलाई उनले निर्देशन दिएका छन् ।

छलफलमा मन्त्रालयका सचिव केदारबहादुर अधिकारी, स्वास्थ्य तथा जनसंख्या मन्त्रालयका विशेषज्ञ प्रतिनिधि, गृह मन्त्रालयका प्रतिनिधि, प्राधिकरण, होटल संघ, वायुसेवा सञ्चालकका प्रतिनिधि, पर्यटक बस व्यवसायी संघलगायतका पर्यटन तथा हवाई क्षेत्रसँग सम्बन्धित निजी क्षेत्रका संघसंस्थाका प्रतिनिधिको उपस्थिति रहेको थियो । रासस

http://noc.org.np/