विश्वकप पुरुष टि-२० को टुंगो अर्को महिना लाग्ने
Thursday Jun 11, 2020
वि.सं.२०७७ जेठ २९ बिहीवार १८:५१
एजेन्सी- यो वर्ष हुने पुरुष विश्वकप (टि–२०) को टुंगो अर्को महिना लाग्ने भएको छ । अन्तर्राष्ट्रिय क्रिकेट काउन्सिलले टि–२० विश्वकप र आईसीसी महिला क्रिकेट विश्व कप २०२१ का लागि निर्णय गर्न अर्को महिनासम्म समय लिने निर्णय गरेको हो ।
कोरोना भाइरसको महामारीका कारण अन्यौलमा रहेको विश्वकपबारे आईसीसीले ठोस निर्णय गर्न सकेन । अघिल्लो साता बसेको आईसीसीको बैठकले पनि विश्वकपको बारेमा निर्णय गर्न नसक्दा महत्वपूर्ण एजेन्डाको रुपमा आजको बैठकमा यो निर्णय पेश भएको थियो । आईसीसीको भर्चुअल बैठकमा विश्वकपका बारेमा छलफल भएपनि ठोस निश्कर्ष निस्कन नसकेको आईसीसीले उल्लेख गरेको छ ।
छलफलमा विश्वकपका लागि अझै केही महिना समय बाँकी रहेको कारण तत्काल निर्णय नलिने आईसीसीको धारणा छ । केही समयमा कोरोनाको संक्रमण हट्न पनि सक्ने कतिपयको बुझाई भएकोले धेरैले तत्काल विश्वकप स्थगित नगर्न सुझाव दिएका छन् । विश्वकप टि–२०, २०२१ मा सार्नलाई निकै सकस हुने बैठकमा कुरा उठेको थियो । महिला विश्वकप सोही बर्ष पर्ने भएको कारण टि–२० २०२२ सम्म सार्नसके मात्र औचित्य हुने धेरैले सुझाव दिएका छन् ।
बैठकमा आईसीसीले टि–ट्वेन्टी विश्वकप र आईसीसी महिला क्रिकेट विश्व कप २०२१ को भविष्यको सम्बन्धमा विभिन्न आकस्मिक योजनाहरुको अन्वेषण जारी राख्ने निर्णय भने गरेको छ । बोर्डले लगातार परिवर्तन भइरहेको जनस्वास्थ्य स्थितिको आकलन र मूल्याङकनलाई निरन्तरता दिँदै रोकिएका प्रतियोगिता सञ्चालन र अन्य बाँकी योजनाबारे केही समयमा निर्णय लिने निश्कर्ष निकाल्यो ।