मुख्य खबर

प्रहरी जवानको हत्यामा ७ जना संलग्न भएको सार्वजनिक

  • आर्थिक प्लस संवाददाता

    २०७७ कार्तिक ४ गते, मंगलवार २०:०० मा प्रकाशित

धनगढी । कैलालीको धनगढी उपमहानगरपालिका १२ जुगेडा अस्थायी पोष्टमा कार्यरत प्रहरी सहायक निरीक्षक ९असई० र प्रहरी जवानको हत्यामा ७ जना संलग्न भएको खुलेको छ । गत शनिबार राति हत्या गरिएका दुई जना प्रहरीको धनगढी उपमहानगरपालिकाका ७ जना युवा मिलेर गरेको प्रहरीले सार्वजनिक गरेको छ।

जिल्ला प्रहरी कार्यालय कैलालीले मंगलबार पत्रकार सम्मेलन गर्दै अस्थायी प्रहरी पोष्ट जुगेडाका इन्चार्ज प्रहरी सहायक निरीक्षक गोविन्द बिक र प्रहरी जवान रामबहादुर साउँदको हत्यामा संलग्न भएको आरोपमा पक्राउ परेका ७ जनालाई सार्वजनिक गरेको हो।

पक्राउ पर्नेमा धनगढी उपमहानगरपालिका वडा नम्बर १० का ३१ वर्षीय पंकु भनिने रोहित राना, २० वर्षीय राजेन्द्र राना, ३० वर्षीय चोर भनिने सुरेश राना, २५ वर्षीय गब्बर भनिने राजकुमार राना, वर्ष २२ को रामनिवास राना, २९ वर्षीय टल्लु भनिने दलराम राना र वडा नम्बर ११ बस्ने २५ वर्षीय गोपाल भनिने रामगोपाल राना रहेका छन्।

उनीहरुले नेपालबाट भारत सामान तस्करी गर्दा प्रहरीले अवरोध सिर्जना गरेपछि आक्रमण गरी हत्या गरेको स्वीकार गरेको प्रहरीले जनाएको छ। प्रहरीले अनुसन्धानका लागि १६ जनालाई नियन्त्रणमा लिएकोमा ७ जनाको संलग्नता देखिएको जनाएको छ ।

गत शनिबार राति नियमित गस्तीमा खटिएका बेला अस्थायी प्रहरी पोष्ट जुगेडाका इन्चार्जसमेत रहेका बिक र प्रहरी जवान वेपत्ता भएका थिए । उनीहरुलाई राति १० बजे सम्पर्क गर्दासमेत फोन नलागेपछि बिहानसम्म प्रतिक्षा गर्दासमेत नआएपछि खोजी गरिएको थियो ।

प्रहरी सहायक निरीक्षक बिकको शव आइतबार बिहान धनगढी उप–महानगरपालिका वडा नम्बर १० को नेपाल–भारत सीमास्थित मोहना नदीको किनारामा भेटिएको थियो भने घाँटीमा धारिलो हतियार प्रहार गरी विभत्स हत्या गरेको अवस्थामा बिक भेटिएकै मोहना नदी क्षेत्रमा मंगलबार प्रहरी जवान साउँदको शव पनि फेला परेको थियो । प्रहरीका अनुसार बिकको शव भेटिएको स्थानदेखि २ सय मिटर तल मोहना नदीमै उनको शव भेटिएको थियो।

उनीहरु सवार बा ५८ प ५२८४ नम्बरको मोटरसाइकल भने घटना स्थलदेखि करिब साढे २ किलोमिटर टाढा भेटिएको थियो भने प्रहरी सहायक निरीक्षक बिकले बोकेको पेस्तोल मंगलबार मोहना नदीमै भेटिएको छ।

पत्रकार सम्मेलनमा जिल्ला प्रहरी कार्यालय कैलालीका प्रमुख प्रहरी उपरीक्षक दिलिपसिंह देउवाले घटनाको थप अनुसन्धान भइरहेको बताए । उनले भने, ‘घटनाको प्रारम्भिक अनुसन्धानको क्रममा यी ७ जनाको संलग्नता देखिएको छ, थप अनुसन्धान जारी छ।’