सेयर कारोबारमा लाग्दै आएको ब्रोकरहरुको सेवा शुल्क घट्यो, यस्तो छ नयाँ कमिसन दर
Saturday Dec 26, 2020
वि.सं.२०७७ पुस ११ शनिवार ०८:११
काठमाडाैं । नेपाल धितोपत्र बोर्ड (सेवन)ले धितोपत्र बजारको सुधार तथा विकासका क्रममा सेयर कारोबारमा लाग्दै आएकाहरुको कमिसन घटाएको छ ।
सेवनले शुक्रबार प्रेस विज्ञप्ति जारी गर्दै बोर्डले साना लगानीकर्ताहरुलाई कारोबार सेवा वापत लिँदै आएको न्यूनतम शुल्कमा ६० प्रतिशत कम हुने गरी सेवा शुल्क घटाएको हो ।
त्यस्तै सरकारी तथा संस्थागत ऋणपत्र, सामूहिक लगानी कोषको इकाई तथा अन्य धितोपत्रको खरिद तथा बिक्री कारोबारमा लिँदै आएको शुल्कमा ५० प्रतिशत र संगठित संस्थाको सेयर खरिद तथा बिक्री कारोबारमा लिँदै आएको शुल्कमा ३३ प्रतिशत घटाएको छ ।
पछिल्लो समयमा धितोपत्र बजारमा ८५ प्रतिशतभन्दा बढी कारोबार अनलाइनमार्फत हुने गरेको दैनिक कारोबार परिमाणमा बढोत्तरी हुँदै गइरहेको सन्दर्भमा समेत धितोपत्र दलाल व्यवसायीले लिने सेवा शुल्कमा पुनरावलोकन गरी समसामयिक बनाउन सेवनले सेवा शुल्क पुनारावलोकन गरेको जनाएको छ ।
सेवनले को छ । यसअघि कारोबारमा लाग्दै आएका व्यवसायीहरुले ०.४० प्रतिशतदेखि ०.६० प्रतिशतसम्म शुल्क तिर्दै आएका थिए ।
बोर्डले ५० हजार रुपैयाँसम्मको कारोबारका लागि ०.४० प्रतिशत शुल्क कायम गरेको छ भने ५० हजारदेखि ५ लाखसम्मको कारोबारमा ०.३७ प्रतिशत कायम हुनेछ ।
यसैगरी ५ लाखदेखि २० लाखसम्मको कारोबारमा ०.३४ प्रतिशत, २० लाखदेखि १ करोडसम्मको कारोबारमा ०.३० प्रतिशत तथा १ करोडभन्दा बढीको कारोबारमा ०.२७ प्रतिशत शुल्क निर्धारण गरेको छ ।
यसअघि ५० हजारसम्मको कारोबारका लागि ०.६० प्रतिशत, ५० हजारदेखि ५ लाखसम्मको कारोबारका लागि ०.५५ प्रतिशत, ५ लाखदेखि २० लाखसम्मको लागि ०.५० प्रतिशत, २० लाखदेखि १ करोडसम्मका लागि ०.४५ प्रतिशत र १ करोडभन्दा बढीका लागि ०.४० प्रतिशत शुल्क लाग्ने व्यवस्था थियो ।
सरकारको जमानत वा पूर्ण सुरक्षित हुने गरी सरकारी संस्था वा नेपाल राष्ट्र बैंकले जारी गरेको ऋणपत्र र अन्य संस्थागत ऋणपत्रको कारोबार गर्दाको शुल्कमा सेवनले ०.०२ प्रतिशतदेखि ०.१० प्रतिशकतसम्म शुल्क कायम गरेको छ ।
सेवनका अनुसार ५ लाखसम्मको लागि ०.१० प्रतिशत, ५ लाखदेखि ५० लाखसम्मको कारोबारका लागि ०.०५ प्रतिशत तथा ५० लाखभन्दा बढीको कारोबारका लागि ०.२० प्रतिशत शुल्क लाग्ने व्यवस्था गरिएको छ ।
सामूहित लगानी कोषको इकार्य तथा अन्य धितोपत्रको हकमा ०.१० प्रतिशतदेखि ०.१५ प्रतिशतसम्म शुल्क निर्धारण गरेको छ ।
जसमा ५ लाखसम्मका लागि ०.१५ प्रतिशत, ५ लाखदेखि ५० लाखसम्मको कारोबारका लागि ०.१२ प्रतिशत र ५० लाखभन्दा बढीको कारोबारका लागि ०.१० प्रतिशत शुल्क लाग्नेछ ।
सेयर, ऋणपत्र, सामूहिक लगानी योजना लगायत अन्य धितोपत्रको कारोबारमा वृद्धि हुनुका साथै नयाँ लगानीकर्ताहरुसमेत बजार प्रवेशका लागि प्रोत्साहित हुने र यसबाट समग्र धितोपत्र बजार गतिशील एवं प्रतिस्पर्धी हुने अपेक्षाले शुल्क घटाएको सेवनले जनाएको छ ।