राज्यमन्त्री मानन्धरले के-के गरे ? पढ्नुहोस् मानन्धरले सामाजिक संजाल मार्फत दिएको साबिती बयान अघिल्लो बर्षको लकडाउनमा मन्त्रीहरु गुमनाम हुँदा सिंगो राज्यकै तर्फ बाट सक्रियता जनाएका शहरी विकास राज्यमन्त्री रामबीर मानन्धरले राज्यमन्त्री बाट बिदा पाए पछि प्रधानमन्त्रीलाई बिशेष धन्यवाद दिएका छन्।

राज्यमन्त्री रहदै गीत गाएर गिनिज बुकमा नाम लेखाएका मानन्धरले आज सामाजिक संजाल मार्फत धन्यवाद दिदै यस्तो लेखेका छन्। सम्माननीय प्रधानमन्त्री केपी शर्मा ओलीज्यू को नेतृत्वमा २०७६ मंसीर ४ देखि २०७८ जेठ २१ गते सम्म सहरी विकास राज्यमन्त्रीको जिम्मेवारीमा रहेँ ।

समृद्ध नेपाल सुखी नेपालीको राष्ट्रिय संकल्प पुरा गर्ने अभियानमा राज्यमन्त्री पदको हैसियतमा रहि जन आकांक्षा पुरा गर्ने अवसरका रुपमा कार्य गर्न पाएँ ।

यस अवधिमा जनताको विकासको तिब्र चाहना पुरा गर्नका लागि पारदर्शीरुपमा कार्य गर्दै आएको सबैमा जानकारी नै छ । नेपाल सरकारले मन्त्री राज्य मन्त्रीहरुलाई निवास व्यवस्थापनका लागि उपलब्ध गराउने हरेक महिनाको रु ४० हजारका दरले १८ महिना सम्मको रु ७ लाख २० हजार र कार्यालय व्यवस्थापनका सुविधा अन्तरगत प्राप्त हुने रु २ लाख रकम समेत नलिईएको सबैमा जानकारी गराउँदछु । साथै खर्च भएर नजाने जिन्सी सामानहरु ल्यापटप तथा आइप्याड र सवारी साधन समेत फिर्ता बुझाएको जानकारी गराउँदछु ।

यो अवधिमा पारिश्रमिकको आधा रकम जनताको जीवन रक्षाका लागि कोभिड कोषमा गएको र चल अचल सम्पत्ती विवरणमा कुनै हेरफेर नभएको समेत अवगत गराउँदछु ।

साथै २०७० साल देखिनै निरन्तर रुपमा पार्टीको लेवी मासिक रु १५ हजार तथा काठमाडौं क्षेत्र नं ७ को पार्टी कार्यालय सञ्चालनका लागि मासिक रु १५ हजार घर भाडा सहित अन्य खर्च व्यवस्थापन गर्दै आइरहेको जानकारी गराउँदछु ।

सरकारबाट बिदा भएपनि नेकपा एमालेको एक नैतिकवान, इमान्दार सिपाहीका रुपमा जनताको बिचमा सदाझैं रहिरहने प्रतिबद्धता व्यक्त गर्दछु। समृद्ध नेपाल निर्माणको राष्ट्रिय अभियानमा विश्वास गरी राज्यमन्त्रीको जिम्मेवारीमा काम गर्ने अवसर दिनुभएकोमा नेकपा एमालेका श्रदय अध्यक्ष एवं सम्माननीय प्रधानमन्त्रीज्युलाई विशेष धन्यवाद दिन चाहन्छु ।

साथै सधैं साथ र समर्थनका लागि काठमाडौं क्षेत्र नं ७का मतदाता, समर्थक, शुभचिन्तक मित्रहरु पार्टीका सम्पुर्ण नेता तथा कार्यकर्ता हरूलाई हार्दिक धन्यवाद व्यक्त गर्दछु ।