सामान्यतया चुनाव जितिसकेपछि जनप्रतिनिधिहरु आफ्नो निर्वाचन क्षेत्र फर्किदैनन् भनेर आम नेताहरुलाई आरोप लाग्ने गरेको छ ।

त्यसमाथि पनि मन्त्री भइसकेका नेताहरुले त आफ्नो निर्वाचन क्षेत्रमा काम नगरेपछि कति समयसम्म निर्वाचन क्षेत्रमा जानै सक्दैनन् । केही मात्र त्यस्ता सीमित नेताहरु छन, जसले केन्द्रीय राजनीति सहित आफ्नो निर्वाचन क्षेत्र र जिल्लाको कामलाई संगसँगै अगाडी बढाइरहेका छन । त्यस्तै एक नेता हुन पूर्व उद्योग मन्त्री रमेश रिजाल ।

फागुन २१ मा नयाँ सरकार बनेपछिको अधिकांश समय केन्द्रीय राजनीति र संसदमा आफ्नो अनुपस्थितिको असर नपर्ने गरी आफ्नै निर्वाचन क्षेत्रमा खटिइरहनु भएको छ, पूर्व उद्योग मन्त्री रिजाल ।

अहिले रिजाल संसदमा काम भएको बेला बाहेक जिल्ला र निर्वाचन क्षेत्रमा नै पुग्नु हुन्छ र त्यहाँका विकास निर्माणका काममा प्रत्यक्ष जोडिइरहनु भएको छ । पर्सा क्षेत्र नम्बर—४ बाट चुनाव जित्नु भएको रिजाल अहिले आफ्नै निर्वाचन क्षेत्रमा हुनुहुन्छ ।

केही दिनअघि मात्रै रिजालले पर्साको ठोरी गाँउपालिका—४ विजयवस्तीमा २५ लाख रुपैयाँको लागतामा निर्माण हुन लागेको ढलान सडकको शिलान्यास गर्नुभयो । यस्तै ठोरी गाँउपालिकाकै वडा नम्बर २ स्थित राइधारामा रहेको गणेशमान सिंह पार्क परिसरमा २५ लाख रुपैयाँकै लागतमा निर्माण गर्न लागिएको पर्खालको पनि शिलान्यास गर्नुभयो ।

पूर्वमन्त्री रिजालकै क्षेत्र पर्साको जगरनाथपुर गाँउपालिका—५ धरमपुर टोलामा अहिले सुविधा सम्पन्न स्वास्थ्य चौकी भवन निर्माण कार्य सुरु भएको छ । यस्तै धरमपुर टोलमै नाला निर्माण कार्यपनि सुरु गरिएको छ ।

रिजालले स्वास्थ्य चौकी भवन र नाला निर्माण कार्यको एक साथ शिलान्यास गर्नु भएको हो । धरमपुरमा ४५ लाख रुपैयाँको लागतमा स्वास्थ्य चौकी भवनको निर्माण गर्न थालिएको छ । मधेस प्रदेश सरकारको २५ लाख र जगरनाथपुर गाँउपालिकाको २० लाख गरी कूल ४५ लाख रुपैयाको लागतमा उक्त स्वास्थ्य चौकी भवन निर्माण गर्न लागिएको हो ।

रिजालकै अग्रसरतामा प्रदेश सरकारले दिएको ५० लाख र गाँउपालिकाको ९ लाख गरी कूल ५९ लाख रुपैयाँको लागतमा ३ सय १५ मिटर लम्बाईको पक्की नालाको पनि निर्माण गर्न लागिएको छ । स्वास्थ्य चौकी भवन र नाला दुवैको निर्माण कार्य उपभोक्ता समिति मार्फत गर्न लागिएको हो ।

त्यसो त रिजालको सक्रियतामा नै विगतमा विभिन्न समाज सुधारका कार्यहरु भएका छन् । अहिले पनि रिजालकै पहलमा पर्साको जगरनाथपुर गाँउपालिका- २ मा ज्येष्ठ नागरिकका लागि सामुदायिक भवन निर्माण गर्न थालिएको छ ।

मधेस प्रदेश सरकारले दिएको २५ लाख रुपैयाँको लागतमा उक्त भवन निर्माण गर्न थालिएको हो । घरपरिवारबाट अपहेलित बृद्धबृद्धाहरुको लागि दुई वटा कोठा र शौचालय सहितको सामुदायिक भवन निर्माण गर्न लागिएको पूर्व मन्त्री रिजालले बताउनु भयो ।

यस्तै पूर्वमन्त्री रिजालले सोही पालिकाको वडा नम्बर २ मै ग्राभेल सडकको पनि शिलान्यास गर्नुभएको छ । गण्डक नहरदेखि मठसम्म करिब पाँच सय मिटर ग्राभेल सडक २० लाख रुपैयाँको लागतमा निर्माण गर्न लागिएको हो ।

पूर्व उद्योग मन्त्री एवं प्रतिनिधि सभा सदस्य रिजालको जस्तै अन्य जनप्रतिनिधिले पनि आफ्नो निर्वाचन क्षेत्रमा सक्रियता देखाउने हो भने स्थानीय तहका समस्या सहजै रुपमा समाधान हुन्छन् । जुन सर्वसाधारणका लागि धेरै ठुलो राहतको विषय हुन्छ ।