काठमाडौं । काठमाडौँ । विश्व वातावरण दिवसका अवसरमा जेठ १९ शनिबार ‘तेस्रो सांग्रिला साइकल र्‍याली’ हुने भएको छ । सांग्रिला डेभलपमेन्ट बैंकले ‘इन्धन बचाऔं, वातावरण जोगाऔं,’ भन्ने नाराका साथ डेभलपमेन्ट बैंकर्स एशोसिएसन नेपाल, बि वाइ डी तथा अन्य संघ संस्थाहरुसँगको सहकार्यमा साइकल र्‍याली आयोजना गर्न लागेको हो ।

सो साइकल र्‍यालीमा सहभागी हुन चाहने इच्छुकले जेठ १६ गतेसम्ममा https://www.shangrilabank.com/cyclerally/ मार्फत निशुल्क दर्ता गरी आफ्नो सहभागिताको सुनिश्चितता सक्ने बैंकले जनाएको छ ।

उक्त साइकल र्‍याली जेठ १९ गते बिहान ७ः०० बजेदेखि सानोगौचरन मैदानबाट सुरु हुँदै नागपोखरी, नारायणहिटि, दरबार मार्ग, भद्रकाली मन्दिर, सहिद गेट, त्रिपुरेश्वर रङ्गशाला, थापाथली, माइतीघर, बिजुली बजार, नयाँ बानेश्वर पानी ट्याङकी, पुरानो बानेश्वर, गौशाला, रातोपुल, जर्मन एम्बेसीबाट, सानोगौचरन मैदानमा पुगी समापन गरिने बैंकले जनाएको छ ।

यस्तो कार्यले वातावरण संरक्षणप्रतिको आफ्नो उत्तरदायित्वलाई आत्मसात गर्दै इन्धनको मितव्ययिता एवं साइकल जस्तो बैकल्पिक यातायातको साधनको प्रयोग गरी प्रदुषण नियन्त्रणमा टेवा पुर्‍याउनको निम्ति समाजमा चेतना फैलाउन योगदान पुग्ने विश्वास बैंकले लिएको छ ।

सो साइकल र्‍यालीमा सहभागी भएका सम्पूर्ण सहभागीहरुलाई टिसर्ट र भाग्यशाली एक जना सहभागीहरुलाई साइकल तथा अन्य बम्पर पुरस्कार प्रदान गरिने बैंकले जनाएको छ ।