काठमाडौं । सानिमा रिलायन्स लाइफ इन्स्योरेन्सका विभिन्न पदमा कार्यरत उत्कृष्ट कर्मचारीहरू भारतको मुम्बईमा आयोजना हुने अन्तर्राष्ट्रिय बीमा तालिममा सहभागी भएका छन्। माघ ७ देखि ९ गतेसम्म भारतीय बीमा संस्थानमा सञ्चालन हुने तीन दिने तालिमले बीमा व्यवसायमा आबद्ध कर्मचारीहरूको ज्ञान र सीप अभिवृद्धिमा योगदान पुर्याउनेछ।

बीमा शिक्षा र तालिमको क्षेत्रमा ख्यातिप्राप्त यस संस्थानले व्यवसायिक प्रमाणपत्र प्रदान गर्नुका साथै विविध परीक्षाहरू सञ्चालन गर्दै आएको छ। तालिमका प्रमुख विषयहरूमा बजार प्रवर्द्धन र बिक्री रणनीति, वितरण व्यवस्थापन, संचार कौशलता, व्यवहारिक अन्तरक्रिया, र परामर्श कौशल समावेश गरिएका छन्।

प्रशिक्षणमा सहभागी कर्मचारीहरूलाई बिदाइ गर्दै सानिमा रिलायन्सका प्रमुख कार्यकारी अधिकृत श्री शिवनाथ पाण्डेले उत्कृष्ट कार्य प्रदर्शन गर्ने कर्मचारीहरूको चयन प्रशंसनीय रहेको र यस्ता तालिमले उनीहरूको व्यक्तिगत र व्यावसायिक विकासमा महत्त्वपूर्ण भूमिका खेल्ने उल्लेख गरे। साथै, सिकेको ज्ञान अन्य सहकर्मीहरूसँग बाँड्न र कम्पनीको लक्ष्य हासिल गर्न उपयोग गर्नुपर्नेमा उनले जोड दिए।

यो तालिममा शाखा प्रबन्धक, एरिया म्यानेजर, क्षेत्रीय प्रबन्धक, र प्रदेश प्रमुखहरूको सहभागिता रहेको छ।