काठमाडौं । फेयर एक्सप्रेस मिडिया प्रालिले ‘फेयर इन्टरनेशनल एजुकेशन अवार्ड-२०२५’ को घोषणा गरेको छ। उक्त अवार्डको घोषणा माघ १५ गते मंगलबार काठमाडौं मोडल कलेज (केएमसी) बागबजारमा आयोजित आठौँ वार्षिकोत्सव समारोहका बीच गरिएको हो।

शैक्षिक क्षेत्रमा विगत आठ वर्षदेखि सक्रिय मिडिया संस्था फेयर एक्सप्रेसले शिक्षा क्षेत्रमा महत्वपूर्ण योगदान पुर्याएका व्यक्तिहरू र संस्थाहरूलाई सम्मान गर्ने उद्देश्यले यो अवार्डको आयोजना गरेको हो। मिडियाका प्रबन्ध निर्देशक राजेन्द्र लुइटेलका अनुसार, अवार्डका लागि आवेदन दर्ता खुला गरिएको छ र अवार्डका विभिन्न शिर्षकमा आवेदन दिने आवेदकहरूमध्ये चयन प्रक्रिया विशेषज्ञ टोलिले गर्नेछन्।

फेयर एक्सप्रेस मिडियाले अवार्डका लागि नेपाल र विदेशका शैक्षिक गन्तव्यमा सक्रिय उत्कृष्ट विद्यालय, विश्वविद्यालय, शैक्षिक परामर्श संस्था, तालिम केन्द्र लगायत शिक्षण संस्थाहरूलाई आवेदन दिन आह्वान गरेको छ। साथै, पाँच वर्ष वा सोभन्दा बढी समयदेखि शिक्षा क्षेत्रमा सक्रिय व्यक्तिहरूलाई पनि आवेदन दिन प्रेरित गरिएको छ।

वार्षिकोत्सव समारोहमा नेपाल शैक्षिक परामर्श संघ (इक्यान) का अध्यक्ष शेषराज भट्टराई, शिक्षाविद् विद्यनाथ कोइराला, नेपाल चेम्बर अफ कमर्सकी उपाध्यक्ष उर्मिला श्रेष्ठ, मध्यपश्चिम विश्वविद्यालयका उपकुलपति नन्द बहादुर सिंह, आइप्यानका अध्यक्ष लक्ष्मण केसी, इक्यानका पदाधिकारी र अन्य सम्मानित अतिथिहरूको उपस्थिति रहेको थियो।

यो अवार्ड शैक्षिक क्षेत्रको सुधार र उन्नतिको लागि योगदान पुर्याउने संस्थाहरू र व्यक्तिहरूलाई प्रोत्साहन दिन महत्वपूर्ण कदम हो।