काठमाडौं, १६ फेब्रुअरी २०२५ – नेपाल र पाकिस्तानबीचको खेलकुद सम्बन्धलाई अझ मजबुत बनाउन आयोजित १०औं नेपाल-पाकिस्तान मैत्री टि-२० क्रिकेट प्रतियोगिता-२०२५ भव्यताका साथ सम्पन्न भएको छ। फेब्रुअरी ८ देखि सुरु भएको उक्त प्रतियोगिता १६ फेब्रुअरीमा समापन तथा पुरस्कार वितरण समारोहका साथ सम्पन्न भयो।

प्रतियोगितामा नेपालका विभिन्न क्लबका १२ टिमले भाग लिएका थिए, जसमा हिमालयन क्रिकेट एकेडेमी च्याम्पियन घोषित भयो भने एन्जल्स स्पोर्ट्स एकेडेमी उपविजेता बन्यो। समापन समारोहका प्रमुख अतिथि राष्ट्रिय खेलकुद परिषद्का उपाध्यक्ष श्री ध्रुव आचार्य ले विजेता टिमलाई ट्रफी प्रदान गरे।

सो अवसरमा प्रमुख अतिथि आचार्यले पाकिस्तान राजदूतावासलाई प्रतियोगिता आयोजना गरेकोमा धन्यवाद दिँदै यसले दुई देशबीचको आपसी सम्बन्धलाई अझ सुदृढ बनाउने बताए। साथै, उनले खेलाडीहरूको प्रदर्शनको प्रशंसा गर्दै युवा प्रतिभाहरूलाई प्रवर्द्धन गर्न यस्ता कार्यक्रम महत्वपूर्ण हुने उल्लेख गरे।

नेपालका लागि पाकिस्तानका राजदूत हे.ई. अबरार एच. हाश्मी ले प्रतियोगितामा सहभागी सबै खेलाडी, आयोजक समिति, प्रायोजकहरू र समर्थकहरूलाई धन्यवाद दिएका थिए। उनले नेपाल-पाकिस्तानबीच खेलकुद मार्फत सांस्कृतिक आदानप्रदान र युवाहरूलाई अवसर प्रदान गर्न राजदूतावास निरन्तर प्रतिबद्ध रहेको बताए।

समारोहमा इजिप्ट र चीनका राजदूतहरू, ICIMOD, बंगलादेश तथा चीनका दूतावासका प्रतिनिधिहरू, साथै नेपालका बैंकिङ तथा सांस्कृतिक क्षेत्रका प्रतिष्ठित व्यक्तित्वहरूको उपस्थिति थियो। विशेष अतिथिहरूले उत्कृष्ट प्रदर्शन गर्ने खेलाडीहरूलाई पुरस्कार प्रदान गरेका थिए।

हिमालयन बैंक लिमिटेड र ग्लोबल आईएमई बैंक को प्रायोजनमा सम्पन्न प्रतियोगिताले नेपाल र पाकिस्तानबीचको मैत्रीपूर्ण सम्बन्धलाई थप सुदृढ बनाएको छ। यस प्रतियोगिताको सफल आयोजनाले खेल कूटनीतिलाई अझ प्रवर्द्धन गर्ने संकेत गरेको छ।