काठमाडौं । हिरो मोटोकर्पले यसै हप्ताभित्र नयाँ बाइक सार्वजनिक गर्ने तयारी गरेको छ। कम्पनीले यसपटक १२५ सीसी सेग्मेन्टमा नयाँ मोडल ल्याउने भएको हो, जहाँ पहिले नै कडा प्रतिस्पर्धा रहेको छ।

लन्चअघि नै परीक्षणको क्रममा देखिएको सो मोडलमा कारमा मात्र पाइने क्रुज कन्ट्रोल सुविधा देखिएको छ। त्यस्तै, यसमा एलईडी हेडलाइट र डिजिटल इन्स्ट्रुमेन्ट क्लस्टर रहने सम्भावना छ।

१२४.७ सीसी क्षमताको सिंगल सिलिन्डर एयर–कुल्ड इन्जिनसहित आउने यस बाइकले करिब १० हर्सपावर र १० एनएम टर्क उत्पादन गर्नेछ। साथै, यसमा ५ स्पिड गियरबक्सको संयोजन हुने अपेक्षा गरिएको छ।

औपचारिक मिति घोषणा नभए पनि यो बाइक भारतमा आगामी १९ देखि २० अगस्टभित्र लन्च हुने अनुमान गरिएको छ। यसलाई ‘ग्ल्यामर’ नामले बजारमा ल्याइने सम्भावना छ।

लन्चपछि यसले १२५ सीसी सेग्मेन्टका लोकप्रिय मोडलहरू— होन्डा साइन १२५, एसपी १२५, बजाज पल्सर १२५ र टीभीएसका मोडलसँग सिधै प्रतिस्पर्धा गर्नेछ।