काठमाडौं । कुमारी बैंक लिमिटेड र वीनरक इन्टरनेशनलबीच उद्यमशीलता विकास तथा वित्तीय पहुँच विस्तारका लागि सम्झौता भएको छ। दिगो विकास प्रवर्द्धन गर्ने उद्देश्यका साथ दुवै संस्थाबीच उक्त सम्झौता सम्पन्न भएको हो।

सम्झौताअनुसार दुवै संस्थाले लक्षित समुदायमा उद्यमशीलता विकास, वित्तीय साक्षरता अभिवृद्धि, उद्यमीहरूको प्राविधिक तथा व्यवस्थापकीय क्षमता सुदृढीकरण तथा बैंकयोग्य व्यवसायिक योजना निर्माणमा सहकार्य गर्नेछन्।

दिगो बैंकिङ विभागका प्रमुख अर्पण पौडेलले यस सहकार्यले लक्षित समूहको वित्तीय समृद्धि बढाउन सहयोग पुग्ने बताउनुभयो। कुमारी बैंक दिगो बैंकिङ, वित्तीय समावेशीकरण तथा स्थानीय उद्यम प्रवर्द्धनप्रति प्रतिबद्ध रहेको उहाँको भनाइ छ।

हाल कुमारी बैंकका देशभर ३०२ शाखा, ५० एक्सटेन्सन काउन्टर, ४८ शाखाविहीन बैंकिङ सेवा केन्द्र, ३१७ एटिएम तथा १,१०० भन्दा बढी पीओएस टर्मिनल सञ्चालनमा रहेका छन्। डिजिटल बैंकिङ सेवामार्फत बैंकले ग्राहकलाई सहज सेवा प्रदान गर्दै आएको छ।