काठमाडौँ । नेपालमा कृषि तथा खाद्य प्रणालीलाई अझ विश्वासिलो र सुरक्षित बनाउने उद्देश्यसहित प्रविधि कम्पनी प्रिक्सा (एचष्हब) ले दैलो कृषि (Daily Krishi) लाई अधिग्रहण गरेको छ।

यस अधिग्रहणपछि किसानबाट उत्पादन भएको तरकारी, फलफूल तथा खाद्यान्न कहाँ र कसरी उत्पादन भयो भन्ने जानकारी उपभोक्ताले सजिलै थाहा पाउने ट्रेसिबल प्रणाली विकास गरिने प्रिक्साले जनाएको छ।

प्रिक्साका प्रमुख कार्यकारी अधिकृत (सीईओ) मनीष शर्माका अनुसार नेपालमा खाद्य क्षेत्रमा विश्वासको ठूलो अभाव छ। “हामी जे खान्छौँ, त्यसमा भरोसा हुनु सबैभन्दा महत्वपूर्ण कुरा हो,” उहाँले भन्नुभयो। नेपाललाई केवल बजारको रूपमा नभई नयाँ प्रणाली विकास गर्ने प्रयोगशालाका रूपमा हेरेर काम गरिरहेको उहाँको भनाइ छ।

दैलो कृषि किसान र सहकारीसँग सहकार्य गर्दै सिधै उपभोक्ताको घरसम्म ताजा र प्रमाणित कृषि उपज पु¥याउँदै आएको प्लेटफर्म हो। संस्थापक धीरज चापागाईंको नेतृत्वमा दैलो कृषिले उत्पादनको स्रोत खुल्ने (ट्रेसिबिलिटी) प्रणालीमा काम गर्दै आएको छ।

प्रिक्साले दैलो कृषि अधिग्रहण गरेपछि तत्काल नाम परिवर्तन वा आक्रामक विस्तार गर्नेभन्दा पनि दीर्घकालीन रूपमा कृषि क्षेत्रमा विश्वासिलो, पारदर्शी र दिगो पूर्वाधार निर्माणमा केन्द्रित रहने जनाएको छ।

यस अधिग्रहणलाई नेपालमा खाद्य सुरक्षा मजबुत बनाउने, किसानलाई सशक्त बनाउने तथा उपभोक्ताको आत्मविश्वास बढाउने महत्वपूर्ण कदमका रूपमा हेरिएको छ।