काठमाडौँ । सात बुँदे घोषणापत्र जारी गर्दै प्रथम बागमती प्रदेश लघुवित्त सदस्य सम्मेलन सम्पन्न भएको छ। शुक्रबार काठमाडौंको कार्की ब्याँक्वेटमा आयोजित सम्मेलनको उद्घाटन प्रमुख अतिथि राष्ट्रिय योजना आयोगका उपाध्यक्ष डा. प्रकाशकुमार श्रेष्ठले गर्नुभएको थियो।

“स्वस्थ लघुवित्त, समृद्ध सदस्य” भन्ने मूल नाराका साथ आयोजित सम्मेलनमा बागमती प्रदेशका २४ वटा लघुवित्त तथा सहकारी संस्थाका ३०० भन्दा बढी सदस्य तथा प्रतिनिधिहरूको सहभागिता रहेको थियो।

मानुषी लघुवित्त, स्वावलम्बन लघुवित्त, छिमेक लघुवित्त, सूर्योदय वोमी लघुवित्त तथा महिला सहयोगी बचत तथा ऋण सहकारीको संयुक्त आयोजनामा सम्पन्न सम्मेलनका विभिन्न सत्रमा नेपालका प्रतिष्ठित लघुवित्त विज्ञहरूले लघुवित्तको महत्व, आवश्यकता तथा देशको आर्थिक र सामाजिक विकासमा यसको योगदानबारे आ–आफ्ना धारणा प्रस्तुत गरेका थिए।

लघुवित्त कार्यक्रमलाई अझ सदस्यमुखी, प्रभावकारी तथा दिगो बनाउने उद्देश्यले आयोजना गरिएको सम्मेलनले युवा सदस्यहरूलाई उद्यमशीलतातर्फ प्रेरित गर्ने, सबै सरोकारवालालाई थप जिम्मेवार र उत्तरदायी बनाउने तथा जिम्मेवार लघुवित्त अभ्यासको प्रवर्द्धन गर्ने प्रतिबद्धता व्यक्त गरेको छ।

सम्मेलनको समापन सत्रमा प्रमुख अतिथिका रूपमा पूर्व गभर्नर दिपेन्द्र बहादुर क्षेत्री, लघुवित्त विज्ञ तथा स्वावलम्बन विकास केन्द्रका अध्यक्ष शंकरमान श्रेष्ठ, नेपाल लघुवित्त बैंकर्स संघका अध्यक्ष रामबहादुर यादवलगायत वक्ताहरूले सम्बोधन गर्नुभएको थियो।