काठमाडौं । सगरमाथा लुम्बिनी इन्स्योरेन्स कम्पनी लिमिटेडको आर्थिक वर्ष २०८१/०८२ को २९औँ वार्षिक साधारण सभा आज २०८२ साल पौष २९ गते मंगलबार कालीकास्थित अमृतभोगमा सम्पन्न भएको छ।

कम्पनीका अध्यक्ष मनोहर दास मुलको सभापतित्वमा सम्पन्न सभामा कम्पनीको व्यवसायिक प्रगति, वित्तीय अवस्था तथा भावी कार्यदिशाबारे शेयरधनीहरूलाई जानकारी गराइएको थियो।

सभामा प्रस्तुत विवरणअनुसार सगरमाथा लुम्बिनी इन्स्योरेन्सले आर्थिक वर्ष २०८१/०८२ मा ५० करोड २ लाख ४८ हजार ५२३ रुपैयाँ खुद नाफा आर्जन गरेको छ। यो नाफा अघिल्लो आर्थिक वर्षको तुलनामा ८.५२ प्रतिशतले वृद्धि भएको हो।

यसैगरी, कम्पनीले चालु आर्थिक वर्षमा ३ अर्ब ६२ करोड ५१ लाख ५५ हजार २५५ रुपैयाँ बराबरको दाबी भुक्तानी गरेको जनाएको छ। अघिल्लो आर्थिक वर्षमा कम्पनीको दाबी भुक्तानी २ अर्ब ८३ करोड ३२ लाख ९२ हजार ६१४ रुपैयाँ रहेको थियो।

सभाले सञ्चालक समितिको वार्षिक प्रतिवेदन तथा आर्थिक वर्ष २०८१/०८२ को वित्तीय विवरण पारित गरेको छ। साथै, आर्थिक वर्ष २०८२/०८३ का लागि लेखापरीक्षक नियुक्त गर्ने र सञ्चालक समितिको सिफारिसअनुसार शेयरधनीलाई १५ प्रतिशत नगद लाभांश वितरण गर्ने प्रस्ताव समेत पारित गरेको छ।

सभामा केही शेयरधनीहरूले लिखित सुझाव प्रस्तुत गर्नुका साथै उपस्थित शेयरधनीहरूले आ–आफ्ना धारणा व्यक्त गरेका थिए।