काठमाडौं । नेपाल बैंक लिमिटेडको ६६ औँ वार्षिक साधारण सभा आज बुधबार, २०८२ पौष ३० गते, नेपाल पुलिस क्लब, भृकुटीमण्डप, काठमाडौंमा सम्पन्न भएको छ। सभाको अध्यक्षता सञ्चालक समितिका अध्यक्ष प्रा.डा. डिल्लीराज शर्मा ले गर्नुभएको थियो।

सभा दौरान आर्थिक वर्ष २०८१÷८२ को सञ्चालक समितिको वार्षिक प्रतिवेदन, लेखापरीक्षकको प्रतिवेदन, र आषाढ मसान्त २०८२ को वित्तीय विवरणहरू पारित गरिएका छन्।

साथै, सभाले आर्थिक वर्ष २०८२÷८३ का लागि लेखापरीक्षकको पारिश्रमिक, सेवा, शर्त र सुविधा पारित गर्दै, महालेखापरीक्षकको कार्यालयबाट परामर्श प्राप्त भएपछि लेखापरीक्षक नियुक्त गर्ने अधिकार सञ्चालक समितिलाई दिने प्रस्ताव सर्वसम्मतिले पारित गरेको छ।

नेपाल बैंकको नियमावलीको नियम ३१ बमोजिम, सञ्चालकको पारिश्रमिक, भत्ता र सुविधा सम्बन्धी व्यवस्थामा संशोधन गर्ने प्रस्ताव पनि पारित गरिएको छ। यदि नियमनकारी निकायबाट संशोधन वा सुझाव आएमा आवश्यक परिवर्तन गर्न सञ्चालक समितिलाई अधिकार प्रदान गरिएको छ।