काठमाडौं । नेपाल आयल निगमले पेट्रोलियम पदार्थको खुद्रा मूल्य घटाएको छ। इन्डियन आयल कर्पोरेशनले पठाएको नयाँ मूल्यसूची अनुसार पेट्रोल र डिजेल/मट्टितेलको खरिद मूल्य घटेपछि उपभोक्तालाई राहत स्वरूप मूल्य समायोजन गरिएको निगमले जनाएको छ।

नयाँ मूल्य माघ २ गते (१६ जनवरी २०२६) राति १२:०१ बजेदेखि लागू हुनेछ। सोअनुसार पेट्रोलमा प्रतिलिटर ३ रुपैयाँ र डिजेल तथा मट्टितेलमा प्रतिलिटर १ रुपैयाँ घटाइएको हो।

नवीन दरअनुसार पहिलो वर्गका चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको बिक्री मूल्य प्रतिलिटर १५३ रुपैयाँ ५० पैसा तय गरिएको छ।
दोस्रो वर्गका सुर्खेत र दाङमा १५५ रुपैयाँ, भने तेस्रो वर्गका काठमाडौं, पोखरा र दिपायलमा १५६ रुपैयाँ कायम गरिएको निगमले जनाएको छ।

यस्तै वर्गअनुसार डिजेल/मट्टितेलको मूल्य क्रमशः १३३ रुपैयाँ ५० पैसा, १३५ रुपैयाँ र १३६ रुपैयाँ निर्धारण गरिएको छ।

निगमका अनुसार अन्तर्राष्ट्रिय बजारमा आउने उतारचढावलाई निरन्तर अनुगमन गरिएको छ र आवश्यकताअनुसार भविष्यमा पनि मूल्य समायोजन गरिनेछ।