काठमाडौँ। एनआईसी एशिया बैंक लिमिटेडले बैंकको नाममा रहेका बैंकिङ्ग तथा गैर–बैंकिङ्ग सम्पत्ति र धितो सुरक्षणमा समावेश भएका सम्पत्तिहरूको लिलाम बिक्री सम्बन्धी विस्तृत जानकारी उपलब्ध गराउने उद्देश्यले एक अनलाइन पोर्टल सार्वजनिक गरेको छ।

बैंकले सञ्चालनमा ल्याएको सो पोर्टलमार्फत लिलामी प्रक्रियामा रहेका सम्पत्तिहरूको कित्ता नं., क्षेत्रफल, फोटो, नक्सा तथा स्थान पहिचानका लागि गुगल म्याप लगायतका विवरणहरू एकै स्थानबाट हेर्न सकिने व्यवस्था मिलाइएको बैंकले जनाएको छ।

लिलाम बिक्रीसम्बन्धी प्रकाशित सूचना भित्र रहेको क्युआर कोड स्क्यान गरेर सो पोर्टलमा प्रवेश गर्न सकिन्छ। खरिदमा चासो देखाउने व्यक्तिहरूले सो पोर्टलमा उपलब्ध म्यासेज बक्समार्फत आफ्नो नाम, इमेल, मोबाइल नम्बर र सम्पर्क ठेगाना राखी थप जानकारी माग गर्न सक्ने सुविधा रहेको छ।

बैंकले यस पोर्टलमा सम्पत्ति तथा लिलाम सूचना नियमितरूपमा अद्यावधिक गरिने बताएको छ। यस माध्यमबाट इच्छुक ग्राहकले अनलाइनमै विस्तृत विवरण प्राप्त गरी प्रक्रिया सजिलो र पारदर्शी हुने बैंकको विश्वास छ।