काठमाडौँ।एनसेलले नेपालस्थित अमेरिकी दूतावासको सहकार्यमा नेपालका तीन सहरमा ‘क्रिएटरस् मेला’ आयोजना गर्ने भएको छ। निःशुल्क सहभागितासहित हुने यो मेला नेपाली कन्टेन्ट क्रिएटरहरूलाई सीप विकास, नेटवर्क विस्तार र सहकार्यका अवसर उपलब्ध गराउने उद्देश्यले आयोजना गरिएको हो।

कार्यक्रम भोलि माघ ३ गते चितवनबाट सुरु हुनेछ। त्यसपछि माघ १० गते नेपालगञ्ज र माघ १६ र १७ गते काठमाडौँमा मेला निरन्तरता पाउनेछ। सन् २०२३ देखि सुरु भएको क्रिएटरस् मेलालाई एनसेलले निरन्तर समर्थन गर्दै आएको छ।

एनसेलकी कर्पोरेट कम्युनिकेशन एन्ड सस्टेनेबिलिटी डाइरेक्टर विषाखा लक्ष्मी खड्काले मेलाले कन्टेन्ट क्रिएटरहरूलाई डिजिटल युगसँग मेल खाने सीप हासिल गर्न मद्दत गर्ने बताइन्। “क्रिएटरहरूलाई प्रभावशाली सामग्री उत्पादन गर्ने अवसर प्रदान गर्न पाउँदा हामी उत्साहित छौँ,” उनले भनिन्।

मेलाको नारा ‘भिजन टु भेन्चर’ रहेको छ। यसले सहभागीलाई उनीहरूको सिर्जनात्मक योजनालाई वास्तविक अवसरको जगमा रुपान्तरण गर्न प्रेरित गर्ने लक्ष्य लिएको छ।

अमेरिकी दूतावासका सार्वजनिक मामिला प्रमुख माइक हार्करले मेले आर्थिक र सिर्जनात्मक क्रियाकलाप मार्फत नेपालमा उद्यमशीलता र रोजगारी सुदृढ पार्नेमा विश्वास व्यक्त गरे। “हामी नेपाली क्रिएटरहरूलाई स्थानीय सीमाभन्दा बाहिर अमेरिकी तथा विश्व बजारमा पनि प्रतिस्पर्धी बनाउने लक्ष्य राख्छौँ,” उनले भने।

भिडियो प्रतिस्पर्धा

मेलासँगै एनसेलले भिडियो प्रतिस्पर्धा समेत सञ्चालन गर्दैछ। सहभागीले ‘एनसेल ४जीले तपाईंको जीवन कसरी सजिलो बनाउँछ?’ शीर्षकमा एक मिनेटको भिडियो इन्स्टाग्राम वा टिकटकमा ह्यासट्याग #CreateGaraPostGara प्रयोग गरी अपलोड गर्नुपर्नेछ।
प्रत्येक सहरबाट एक–एक विजेतालाई रु. ५०,००० प्रदान गरिने छ। विजेताहरूले आगामी दिनमा एनसेल फाउन्डेसनका कार्यक्रमहरूमा सहभागी हुने अवसर समेत पाउनेछन्।

सन् २०२३ देखि मेलामा ५,००० भन्दा बढी क्रिएटर सहभागिता जनाइसकेका छन्। यसले देशका क्रिएटरहरूलाई एकै स्थानमा भेला गराउँदै पेशागत सीप हस्तान्तरण, सहकार्य र विशेषज्ञहरूसँग अन्तरक्रिया गर्ने अवसर प्रदान गर्दै आएको छ।

मेलामा स्पट लाइट सत्र, प्यानल छलफल तथा विषयगत विश्लेषण सहित सफल कन्टेन्ट क्रिएटरहरूको अनुभव पनि प्रस्तुत गरिने एनसेलले जनाएको छ।