झापा। कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (CSR) कार्यक्रमअन्तर्गत झापाको मेचीनगर–८ सृजनाचोकस्थित आधारभूत स्वास्थ्य केन्द्रलाई वाटर डिस्पेन्सर हस्तान्तरण गरेको छ।

बैंकको इट्टाभट्टा शाखामार्फत गरिएको हस्तान्तरण कार्यक्रममा बैंकका कोशी प्रदेश प्रमुख खिमलाल भुसालले स्वास्थ्य केन्द्रका प्रमुख दिवाकर पौडेललाई वाटर डिस्पेन्सर हस्तान्तरण गरे। कार्यक्रममा मेचीनगर नगरपालिका–८ का वडा अध्यक्ष गिरीराज धमलाको समेत उपस्थिति रहेको थियो।

स्वास्थ्य केन्द्र प्रमुख पौडेलले बैंकको सहयोगबाट केन्द्रमा सेवा लिन आउने सबै बिरामी लाभान्वित हुने उल्लेख गर्दै विशेषगरी आर्थिक रूपमा कमजोर तथा असहाय सेवाग्राहीका लागि यो सुविधा उपयोगी हुने विश्वास व्यक्त गरे। उनले सामाजिक योगदानका लागि बैंकलाई धन्यवाद पनि दिए।

कामना सेवा विकास बैंकले आगामी दिनमा पनि सरोकारवालाहरूको समन्वयमा समुदायमुखी सामाजिक गतिविधि निरन्तर अघि बढाउने जनाएको छ।