मोरङ । ग्लोबल मनी सप्ताहको अवसरमा नेपाल बीमा प्राधिकरण, कोशी प्रदेश कार्यालयले विराटनगरका विभिन्न कलेजका विद्यार्थीहरूसँग बीमा सम्बन्धी अन्तरक्रिया कार्यक्रम आयोजना गरेको छ। हिमालय दर्शन कलेज, सिटी कलेज र महेन्द्र मोरङ आदर्श बहुमुखी क्याम्पसमा फरक–फरक समयमा भएको कार्यक्रममा बीमाको महत्व, प्रकार, चुनौती, व्यवहारिक प्रयोग, नेपाली बीमा बजारको अवस्था र वित्तीय साक्षरताको आवश्यकता जस्ता विषयमा विस्तृत छलफल गरिएको थियो।

अन्तरक्रिया कार्यक्रमको सञ्चालन सहायक प्रथम मिलन पोख्रेल ले गरेका थिए। कार्यक्रममा कोशी प्रदेश प्रमुख प्रीति देव ले बीमाका सैद्धान्तिक तथा व्यवहारिक पक्षबारे जानकारी दिँदै प्राधिकरणको भूमिका, कर्तव्य र अधिकारबारे विद्यार्थी र शिक्षकलाई बुझाइन्। उनले नेपालको वित्तीय प्रणालीको समग्र परिचय प्रस्तुत गर्दै बीमा क्षेत्रको आवश्यकता र चुनौतीहरूबारे प्रकाश पारिन्।

देवले बीमा क्षेत्रको विकासमा युवाहरूको सक्रिय भूमिका आवश्यक रहेको उल्लेख गर्दै यस्ता कार्यक्रमले विद्यार्थीहरूलाई बीमा क्षेत्रमा आकर्षित गर्न मद्दत पुग्ने विश्वास व्यक्त गरिन्। कार्यक्रमको अन्तर्गत हाजिरीजवाफ प्रतियोगिता पनि आयोजना गरिएको थियो, जसले विद्यार्थीहरूमा उत्साह थपेको थियो।

समापनमा, सहभागीहरूको प्रश्नको समाधान गर्दै उनले बीमा क्षेत्रमा दक्ष जनशक्तिको अभाव रहेको र यस क्षेत्रमा भविष्य उज्ज्वल रहेको बताए। यसैबीच, प्राधिकरणले सञ्चालन गरेको निबन्ध लेखन प्रतियोगिताबारे पनि जानकारी दिइएको थियो। आगामी दिनमा यस्ता सचेतनामूलक कार्यक्रमलाई निरन्तरता दिने प्रतिबद्धता व्यक्त गरिएको छ।