काठमाडौँ । नेपालमा उद्योग तथा व्यवसायमा उर्जा दक्षताको प्रवर्द्धन निमित्त अनुदान योजनाको सुरुवात भएको छ । नवीकरणीय ऊर्जा तथा उर्जा दक्षता कार्यक्रम–नेपालमा दिगो ऊर्जामार्फत पुनर्प्राप्ति एवं सशक्तिकरण कार्यक्रमअन्तर्गत उक्त अनुदान योजनाको सुरुवात भएको हो ।

राष्ट्रिय वाणिज्य बैंक व्यवस्थापक रहेको यस अनुदान योजनाको प्रमुख उद्देश्य उद्योग तथा व्यवसायहरूलाई ऊर्जा दक्षताका उपाय अवलम्बन गर्न प्रोत्साहन गर्नु रहेको जनाइएको छ । यस पहलको प्रमुख उद्देश्य उद्योग तथा व्यवसायमा ऊर्जाको दक्ष उपयोगबाट ऊर्जा खपतमा कमी ल्याई नेपालमा दिगो औद्योगिक विकासलाई बढावा दिनु र कार्बन उत्सर्जन घटाउनु रहेको बैंकद्वारा जारी विज्ञप्तिमा छ । सो पहलअन्तर्गत ऊर्जा परिक्षकबाट सिफारिस भएका ऊर्जा दक्षताका उपाय कार्यान्वयनमा प्रोत्साहन दिन बैंकले आंशिक अनुदान उपलब्ध गराउने विज्ञप्तिमा छ ।

अनुदान संचालन निर्देशिकाअनुसार आशिंक अनुदान, ऊर्जा दक्षताका उपायमा कूल आवश्यक लगानीको एक निश्चित प्रतिशन हुने बैंकले जनाएको छ । अनुदानको निमित्त योग्य हुन उद्योग व्यवसायले मर्यादित कामका सिद्धान्त तथा वातावरणीय मापदण्ड अबलम्बन गरेको हुनुपर्नेछ । जर्मन संघीय आर्थिक सहयोग, विकास मन्त्रालय (बिएमजेड) तथा युरोपियन युनियनको आर्थिक सहयोगमा ऊर्जा, जलस्रोत र सिंचाई मन्त्रालयद्वारा संचालित उक्त कार्यक्रममा जर्मन विकास सहयोगले प्राविधिक सहयोग पुर्‍याउँदै आएको छ ।