काठमाडौं। नेपालका लागि प्रोटोनको आधिकारिक वितरक जगदम्बा मोटर्स र प्रोटोन मलेसियाले नेपालको इलेक्ट्रिक मोबिलिटीतर्फको भविष्यलाई लक्षित गर्दै सहकार्य अझै मजबुत पार्ने घोषणा गरेका छन्।

नेपाली बजारमा मलेसियाको पहिलो स्थानीय रूपमा विकास गरिएको ईभी प्रोटोन ईमास ७ भित्र्याएपछि यो साझेदारी अझै फराकिलो बनेको दुवै कम्पनीको भनाइ छ।

जगदम्बा मोटर्सले सार्वजनिक गरेको विज्ञप्तिमा प्रोटोन र जिली दुवैसँग आफ्नो सहकार्य रहेको र नेपालमा प्रोटोन तथा जिलीका गाडीको सेल्स, सर्भिसिङ र वारेन्टी दिने एक मात्र आधिकारिक कम्पनी आफूहरुमात्रै भएको स्पष्ट पारेको छ।

प्रोटोन इन्टरनेसनल कर्पोरेसनका सीईओ एडमन्ड लिम मेङले २०१८ देखि नै दुवै कम्पनीबीच सहकार्य रहेको र नेपालमा हालै प्रोटोन ईमास ७ आएको कारण साझेदारी अझ बलियो बनेको बताए। साथै, नेपालमा जिली ब्रान्डका लागि कुनै आधिकारिक वितरक नियुक्त नगरेको समेत उनले स्पष्ट पारे।

जगदम्बा मोटर्सका एक्जिक्युटिभ डाइरेक्टर अखिल गुप्ताले सहकार्य डिष्ट्रिब्युटरको रुपमा मात्र नभई नेपाली ग्राहकलाई उपयुक्त ईभी उपलब्ध गराउने प्रतिबद्धतासहित भएको बताए।

हाल नेपालमा प्रोटोनका ३ शोरुम र सर्भिस सेन्टर सञ्चालनमा छन् भने कम्पनीले २०२५ को अन्त्यसम्म १२ पुर्‍याउने योजना सार्वजनिक गरेको छ। साथै, प्रोटोनका जेन्युइन स्पेयर पार्ट्स, जिली–प्रोटोन सर्टिफाइड टेक्निसियन, एड्भान्स्ड डायग्नोस्टिक टुल्स र वारेन्टी सेवा उपलब्ध हुने कम्पनीको भनाइ छ।