ललितपुरमा वाणिज्यसम्बन्धी अन्तर्राष्ट्रिय सम्मेलन हुने, मेगा कलेजले थाल्यो तयारी

काठमाडौं ।समकालीन वाणिज्यका मुद्दाहरुसँग सम्बन्धित दोस्रो अन्तर्राष्ट्रिय सम्मेलन जेठ १ र २ गते ललितपुरमा हुने भएको छ ।

नेपाल कमर्श एसोसिएसनसँगको सहकार्यमा मेगा कलेज कुमारीपाटी ललितपुरले दोस्रो अन्तर्राष्ट्रिय सम्मेलन आयोजना गर्न लागेको हो । सम्मेलनमा नवप्रवर्तन, दिगोपन र विश्वव्यापी प्रतिस्पर्धासँग जोडिएका विषयमा विज्ञहरुले प्रवचन तथा प्रस्तुति दिनेछन् ।

आयोजक मेगा कलेज कुमारीपाटीका प्राचार्य डा.घनश्यामप्रसाद साहका अनुसार सम्मेलनमा नेपाल र भारतसहित विभिन्न देशका प्राध्यापक, व्यवस्थापनविद्, नीति निर्माता तथा विद्यार्थीहरुको सहभागिता रहनेछ । मेगा कलेज कुमारीपाटीको अडिटोरियमक हलमा आयोजना हुने सम्मेलनमा तीव्र गतिमा परिवर्तन भइरहेको विश्व अर्थतन्त्र, प्रविधिको विकास, दिगो विकासको आवश्यकता र अन्तर्राष्ट्रिय प्रतिस्पर्धाको सन्दर्भमा व्यापार तथा व्यवस्थापन क्षेत्रले भोगिरहेका चुनौती र सम्भावनाबारे गहिरो विमर्श हुने डा.साहले बताए।

यो अन्तर्राष्ट्रिय सम्मेलन मुख्यतः उद्योग, व्यापार, वाणिज्यजस्ता क्षेत्रमा विश्वभर चलेको ट्रेन्डको अध्ययन गर्न, नेपालजस्तो देशले लिनुपर्ने नीतिको फ्रेमवर्क तयार पार्न तथा अनुसन्धानकर्ताहरुको ज्ञानका दृष्टिले निकै महत्वपूर्ण रहनेछ ।

अर्थतन्त्रका विद्यार्थीदेखि विज्ञसम्मले यसबाट प्रत्यक्ष लाभ लिन सक्नुहुनेछ’, साहले भने । यसअघि मेगा कलेज कुमारीपाटीले सन् २०१९ मा पनि व्यवस्थापनसम्बन्धी अन्तर्राष्ट्रिय सम्मेलन आयोजना गरेको थियो ।

यसपटक सम्मेलनअन्तर्गत रणनीतिक व्यवस्थापन र नेतृत्व, डिजिटल रूपान्तरण तथा नवप्रवर्तन, बजार व्यवस्थापन र उपभोक्ता व्यवहार, वित्त तथा दिगोपन, उद्यमशीलता र साना तथा मझौला उद्योग, मानव संसाधन व्यवस्थापन, अन्तर्राष्ट्रिय व्यापार तथा आर्थिक नीति, हरित अर्थतन्त्र र जिम्मेवार व्यवसाय, साथै कर तथा कानुनी पक्षजस्ता विविध विषयमा शोत्रपत्र र कार्यपत्रहरु प्रस्तुत एवं छलफल हुनेछ ।

सम्मेलनबाट विशेषगरी अनुसन्धानकर्ता, प्राध्यापक, उद्योगी–व्यवसायी, नीति निर्माता तथा स्नातकोत्तर तहका विद्यार्थीहरू लाभान्वित हुने अपेक्षा गरिएको छ ।

सहभागीहरूले आफ्ना अनुसन्धान प्रस्तुत गर्ने, अन्तर्राष्ट्रिय अनुभव भएका विज्ञहरूसँग अन्तरक्रिया गर्ने तथा सहकार्यका नयाँ अवसरहरू खोज्ने अवसर प्राप्त गर्ने आयोजक मेगा कलेज कुमारीपाटीले जनाएको छ ।

सम्मेलनबाट प्राप्त निष्कर्षहरूले नेपालको व्यापार तथा व्यवस्थापन शिक्षालाई अन्तर्राष्ट्रिय स्तरअनुसार अद्यावधिक गर्न, नीतिगत सुधारका लागि आधार तयार गर्न तथा नवप्रवर्तन र उद्यमशीलतालाई प्रवद्र्धन गर्न महत्वपूर्ण योगदान पुर्याउने विश्वास गरिएको छ ।