नेपाल राष्ट्र बैंकले मार्जिन प्रकृतिको सेयर धितो कर्जाको सीमामा कुनै पनि परिवर्तन नहुने बताएको छ । राष्ट्र बैंकले कार्यान्वयनमा ल्याएको नीति तत्कालै परिवर्तन नहुने राष्ट्र बैकका प्रवक्ता देवकुमार ढकालले बताए ।

“नेपाल राष्ट्र बैंकले लिएको नीति र कार्यान्वयका लागि जारी भएका सर्कुलरहरू कार्यान्वयनमा आएलगत्तै रिभ्यू भएको छैन,” ढकालले भने, “विगत केही समयदेखि राष्ट्र बैंकले यस्ता पोलिसीहरू र त्यसको कार्यान्वयन अवस्थाको समीक्षा त्रैमासिक रूपमा मात्रै गर्दै आएको छ । त्योभन्दा अगाडि यस्तो पोलिसीमा रिभ्यू गर्ने सम्बन्धमा कुनै पनि छलफल भएको छैन ।”

मार्जिन प्रकृतिको सेयर धितो सम्बन्धी व्यवस्थामा कुनै परिमार्जन हुन्छ भन्ने कुरामा आफू विश्वस्त नरहेको ढकाल बताउँछन् ।

आजै लगानीकर्ताको एउटा समूहले मार्जिन प्रकृतिको सेयर धितो कर्जामा लगाएको सीमा हटाउनुपर्ने भन्दै राष्ट्र बैंक घेराउ गरेको थियो । यता आजै अर्थमन्त्री जनादर्न शमाले पनि गभर्नर महाप्रसाद अधिकारीलाई फोन गरेर सेयर बजारमा देखिएको समस्या समाधान गर्न निर्देशन दिएको भन्दै अर्थमन्त्रीको सचिवालयले जानकारी दिएको थियो ।