काठमाडौं । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (सीएसआर) कार्यक्रमअन्तर्गत हेल्पिङ ह्यान्ड्स बालगृहलाई वाटर डिस्पेन्सर हस्तान्तरण गरेको छ।

बैंकको नक्साल शाखामार्फत सितापाइलास्थित हेल्पिङ ह्यान्ड्स बालगृहलाई उक्त सामग्री हस्तान्तरण गरिएको हो। बैंकका काठमाडौं क्षेत्र प्रमुख खेदारनाथ शर्माले बालगृहका सृजना नेपालीलाई वाटर डिस्पेन्सर हस्तान्तरण गर्नुभएको थियो।

बालगृहमा आश्रित बालबालिकाहरूलाई स्वच्छ तथा सुरक्षित खानेपानीको पहुँच सहज बनाउने उद्देश्यले उक्त सहयोग प्रदान गरिएको बैंकले जनाएको छ। यस सहयोगले बालगृहमा रहेका बालबालिकाहरूको दैनिक जीवनयापनमा सकारात्मक योगदान पुग्ने विश्वास बैंकले व्यक्त गरेको छ।

कार्यक्रममा हेल्पिङ ह्यान्ड्स बालगृहकी सृजना नेपालीले बालगृहका बालबालिकाहरूको आवश्यकता सम्बोधन गर्न सहयोग पुर्‍याएकोमा कामना सेवा विकास बैंकप्रति आभार व्यक्त गर्नुभयो। उहाँले यस्ता सामाजिक सहयोगले संस्थालाई आफ्ना सेवा तथा गतिविधिहरू अझ प्रभावकारी रूपमा सञ्चालन गर्न मद्दत पुग्ने बताउनुभयो।

उक्त कार्यक्रममा बैंकका कर्मचारीहरू तथा हेल्पिङ ह्यान्ड्स बालगृहका बालबालिकाहरूको समेत उपस्थिति रहेको थियो।

कामना सेवा विकास बैंकले आगामी दिनहरूमा पनि सरोकारवालाहरूसँगको समन्वय र सहकार्यमा यस्ता सामाजिक उत्तरदायित्वका कार्यक्रमलाई निरन्तरता दिने प्रतिबद्धता जनाएको छ।