अर्थ मन्त्रालयले खुला प्रतिस्पर्धामार्फत नेपाल स्टक एक्सचेन्ज(नेप्से)को प्रमुख कार्यकारी अधिकृत(सीईओ)का लागि दरखास्त आह्वान गरेको छ । मन्त्रालयले सिइओ नियुक्तिका लागि सार्वजनिक सूचना जारी गर्दै दरखास्त आह्वान गरेको हो ।

तत्कालीन सीईओ चन्द्रसिंह साउदले शेयर खरिद विवादमा परेर राजीनामा दिएसँगै नेप्से कार्यकारी प्रमुख विहीन बनेको थियो ।बुक बिल्डिङमार्फत साधारण शेयर(आइपिओ) निष्कासनको तयारीमा रहेको सर्वोत्तम सिमेन्टको शेयर साउदको श्रीमतीको नाममा भेटिएपछि उनी विवादमा तानिएका थिए ।

सर्वोत्तमकै शेयर खरिद विवादमा परेका नेपाल धितो पत्र बोर्डका अध्यक्ष भीष्मराज ढुङ्गानालाई भने सरकारले बर्खास्त गरेको थियो । बोर्डको नयाँ अध्यक्ष नियुक्तिका लागि पनि सरकारले दरखास्त आह्वान गरिसकेको छ । योग्य आवेदकहरूलाई १५ दिनभित्र आवेदन दिन आह्वान गरिएको छ ।