काठमाडौ । महानगरका मेयर बालेन साहको ठाडो आदेशमा सरकारी अड्डाको गेटमा फोहोरको डङ्गुर लगाईएको छ।

महानगरले मिनभवनस्थित डिभिजन सडक कार्यालयको गेट अगाडि र बबरमहलस्थित सडक विभागको गेटमा फोहोर थुपारेको हो। महानगरको टिपरले अन्तै बाट ल्याएको फोहोर कार्यालय अगाडि थुपारेको हो ।

फोहोर थुपारेसँगै भौतिक पूर्वाधार तथा यातायातमन्त्री रघुविर महासेठलाई मेयर बालेन्द्र शाह (बालेन) ले धुलो उपहार पठाएको बताएका छन् ।

उनले सडक विभागले काठमाडौंमा सडक विस्तारको काममा ढिलासुस्ती गर्दा महानगरबासीले धुलो खानुपरेको भन्दै मन्त्रीलाई नै धुलो उपहार पठाएको बताएका छन् ।

उनले सामाजिक सञ्जालमा एक भिडियो पोस्ट गर्दै लेखेका छन्, ‘यो धुलो जनताले मात्र खाँदा राम्रो देखिँदैन । जबसम्म तपाईं काम अगाडि बढाउनु हुन्न, हरेक दिन तपाईंलाई पायक पर्ने ठाउँमा एक ट्रक धुलो उपहार पठाउने छु माया सम्झेर स्वीकार्नु होला ।’

मेयर बालेनले विगत १५ वर्षदेखि काठमाडौंका जनताले कलंकीदेखि महाराजगञ्जसम्म रिङरोड विस्तारको नाममा धेरै धुलो र कष्ट व्यहोर्नु परेको बताएका छन् ।

उनले भनेका छन्, ‘काठमाडौंमा हुने आधाभन्दा बढी प्रदूषणमा त्यहाँ कै धुलोको हात छ, जसले गर्दा महानगरवासीले धुलोधुँवा खानु परेको छ, त्यो बाटो प्रयोग गर्नुपर्नेहरूले सवारी साधन मर्मतमा खर्च बढी गर्नु परेको छ, पुग्न अबेला भोग्नु परेको छ । र, काठमाडौँ महानगरले अकारणमा गाली खानु परेको छ ।’