काठमाडौं । नेपाल बिजनेस समिटको दोस्रो संस्करणमा निर्यात व्यवसायी महासंघ नेपाल सह–आयोजकको रूपमा जोडिएको छ । समझदारी पत्रमा महासंघका अध्यक्ष गोविन्द घिमिरे र नेपाल बिजनेस इन्स्टिच्युटका कार्यकारी अध्यक्ष विशाल गैरेबीच हस्ताक्षर भएको छ । समिट आगामी जेठ ४ गते आयोजना हुँदैछ, जसमा देशभरबाट करिब ४०० उद्यमीहरूको सहभागिता रहने अपेक्षा गरिएको छ ।

निर्यात, कृषि, पर्यटन, ऊर्जा, एआई, आईटी तथा सूचना प्रविधिलाई मुख्य विषय बनाइएको समिटमा महासंघले निर्यात क्षेत्रका मुद्दाहरूलाई प्रमुख रूपमा उठाउने जनाएको छ । हस्ताक्षरपछि बोल्दै महासंघका अध्यक्ष घिमिरेले अर्थतन्त्रका वर्तमान चुनौती समाधानका लागि आयात प्रतिस्थापन र निर्यात प्रवद्र्धनलाई प्राथमिकता दिनुपर्ने बताउनुभयो ।

नेपाल बिजनेस इन्स्टिच्युटका कार्यकारी अध्यक्ष गैरेले विभिन्न क्षेत्रका नीतिगत तथा व्यवहारिक चुनौती, सम्भावना र अवसरबारे उद्यमीहरूबीच व्यापक संवाद गरिने जानकारी दिनुभयो । साथै, ती विषयलाई कार्यान्वयनका लागि तीनै तहका सरकारसँग समन्वय गरिने उहाँले प्रतिबद्धता व्यक्त गर्नुभयो ।

सम्झदारी कार्यक्रममा महासंघका वरिष्ठ उपाध्यक्ष देवआनन्द सरावगी, महासचिव शिवप्रसाद भट्ट तथा इन्स्टिच्युटका कार्यक्रम निर्देशक भुवन उप्रेती र कार्यक्रम व्यवस्थापक चन्द्रभक्त अधिकारीको उपस्थिति थियो ।