काठमाडौं — शिक्षा तथा खेलकुद मन्त्री सस्मित पोखरेल ले दशौँ राष्ट्रिय खेलकुद प्रतियोगिताको तयारीको अवस्था बुझ्न कर्णाली प्रदेश रङ्गशालाको अनुगमन गर्नुभएको छ।

अनुगमनका क्रममा मन्त्री पोखरेलले दशौँ राष्ट्रिय खेलकुद प्रतियोगिताको मिति छिट्टै निर्धारण गरिने जानकारी दिँदै प्रतियोगिता निर्धारित समयमै सम्पन्न गराउन सरकार प्रतिबद्ध रहेको बताउनुभयो।

रङ्गशालाको निरीक्षणका क्रममा कर्णाली प्रदेश खेलकुद विकास परिषद् का सदस्य सचिव रविन्द्रचन्द ले मन्त्री पोखरेललाई रङ्गशालाको वर्तमान अवस्था, पूर्वाधार निर्माणको प्रगति तथा प्रतियोगिताको तयारीबारे जानकारी गराउनुभएको थियो।

मन्त्री पोखरेलले कर्णाली प्रदेशमा खेलकुदका लागि आवश्यक भौतिक पूर्वाधारको अभाव रहेको उल्लेख गर्दै खेल क्षेत्रको विकासका लागि सरकारले आवश्यक ध्यान र लगानी गर्ने प्रतिबद्धता व्यक्त गर्नुभयो। उहाँले खेलाडीलाई गुणस्तरीय प्रशिक्षण तथा प्रतियोगिताका लागि उपयुक्त वातावरण निर्माण गर्न पूर्वाधार विकासलाई प्राथमिकतामा राखिने बताउनुभयो।

दशौँ राष्ट्रिय खेलकुद प्रतियोगिताको तयारी तीव्र पारिएको अवस्थामा मन्त्रीको अनुगमनले आवश्यक पूर्वाधार निर्माण र व्यवस्थापन कार्यलाई थप गति दिने अपेक्षा गरिएको छ।