काठमाडौं । माछापुच्छ्रे बैंक लिमिटेडको नायब प्रमुख कार्यकारी अधिकृत (डीसीईओ)मा कल्याण विक्रम पाँडे नियुक्त भएका छन्। पाँडेले गत साउन २९ गते अर्थात् १४ अगस्ट २०२६ देखि बैंकको नायब प्रमुख कार्यकारी अधिकृतका रूपमा पदभार ग्रहण गरेका हुन्।

बैंकिङ क्षेत्रमा २५ वर्षभन्दा बढीको अनुभव रहेका पाँडेले यसअघि ग्लोबल आइएमई बैंक, साविकको जनता बैंक, लक्ष्मी बैंक तथा कुमारी बैंकलगायतका बैंकमा विभिन्न महत्वपूर्ण जिम्मेवारी सम्हालिसकेका छन्।

उनको बैंकिङ अनुभव योजना तथा कार्यान्वयन, कर्पोरेट तथा पूर्वाधार बैंकिङ, एसएमई तथा रिटेल बैंकिङ, व्यवसाय रूपान्तरण तथा डिजिटलाइजेसन, जोखिम व्यवस्थापन तथा अनुपालनलगायतका क्षेत्रमा रहेको छ। साथै ट्रेड फाइनान्स, ट्रान्जेक्सन बैंकिङ, मर्जर तथा एक्विजिसन, बैंक एकीकरण, वित्तीय विश्लेषण, उत्पादन विकास तथा दिगो एवं हरित बैंकिङमा समेत उनले अनुभव हासिल गरेका छन्।

पाँडेले बंगलोर विश्वविद्यालयबाट वित्त विषयमा एमबीए प्रथम श्रेणीमा तथा अलिगढ मुस्लिम विश्वविद्यालयबाट इलेक्ट्रिकल इन्जिनियरिङमा बीटेक उपाधि हासिल गरेका छन्।

नेतृत्व क्षमता र नतिजामुखी कार्यशैलीका लागि परिचित पाँडेको नियुक्तिसँगै बैंकले उनको लामो बैंकिङ अनुभव तथा वित्तीय विशेषज्ञताबाट व्यवसाय विस्तार, सेवा प्रवाहमा सुधार र रणनीतिक लक्ष्य प्राप्तिमा थप योगदान पुग्ने विश्वास लिएको जनाएको छ।

माछापुच्छ्रे बैंकले पछिल्लो समय व्यवसाय विस्तारसँगै डिजिटल बैंकिङ, ग्राहक सेवा तथा संस्थागत क्षमता अभिवृद्धिमा जोड दिँदै आएको छ। पाँडेको जिम्मेवारीले बैंकको आगामी रणनीतिक कार्यदिशा कार्यान्वयनमा समेत महत्वपूर्ण भूमिका खेल्ने अपेक्षा गरिएको छ।