काठमाडौं । महालक्ष्मी विकास बैंक लिमिटेडका डेबिट कार्ड, क्रेडिट कार्ड तथा मोबाइल बैंकिङ प्रयोगकर्ताले विभिन्न होटल, रेष्टुरेन्ट, स्वास्थ्य संस्था तथा अन्य सेवामा विशेष छुट पाउने भएका छन्।

बैंकले ग्राहकलाई थप सुविधा उपलब्ध गराउने उद्देश्यले स्वास्थ्य, होटल तथा रेष्टुरेन्टलगायत विभिन्न क्षेत्रका संस्थासँग सम्झौता गरी विशेष छुटको व्यवस्था गरेको हो।

सम्झौताअनुसार बैंकका ग्राहकले मनकामना हिलक्रेष्ट होटल, एलोफ्ट काठमाडौं, एल्लो हात्ती, अल्फा केयर डायग्नोस्टिक सेन्टर, दृष्टि आई केयर, ओरियन्ट क्याफे र होटल स्मारकका विभिन्न सेवा प्रयोग गर्दा छुट पाउनेछन्।

ग्राहकले कुरिनटार, चितवनस्थित मनकामना हिलक्रेष्ट होटलको आवास तथा रेष्टुरेन्ट सेवामा १२.५ प्रतिशतसम्म छुट पाउनेछन्। त्यस्तै, ठमेलस्थित एलोफ्ट काठमाडौंको खाना तथा पेय पदार्थमा १५ प्रतिशतसम्म छुट उपलब्ध हुनेछ।

लाजिम्पाटस्थित एल्लो हात्तीको उपहार सामग्री खरिदमा १० प्रतिशतसम्म तथा बुद्धनगरस्थित अल्फा केयर डायग्नोस्टिक सेन्टरको स्वास्थ्य परीक्षण तथा प्रयोगशाला सेवामा २० प्रतिशतसम्म छुट पाउने व्यवस्था गरिएको बैंकले जनाएको छ।

यसैगरी, कलंकीस्थित दृष्टि आई केयरमा नाक, कान, घाँटी तथा आँखा उपचार एवं प्रयोगशाला सेवामा २० प्रतिशतसम्म छुट उपलब्ध हुनेछ। दरबारमार्गस्थित ओरियन्ट क्याफेको खाना तथा पेय पदार्थमा १५ प्रतिशतसम्म र हेटौंडास्थित होटल स्मारकको आवास तथा खाना एवं पेय पदार्थमा १५ प्रतिशतसम्म छुट पाइनेछ।

बैंकका अनुसार यस्तो सहकार्यबाट आफ्ना डेबिट कार्ड, क्रेडिट कार्ड तथा मोबाइल बैंकिङ प्रयोग गर्ने ग्राहक प्रत्यक्ष रूपमा लाभान्वित हुनेछन्। बैंकले ग्राहकको दैनिक जीवनसँग सम्बन्धित विभिन्न सेवामा सहज तथा अतिरिक्त सुविधा उपलब्ध गराउने उद्देश्यले यस्ता साझेदारीलाई निरन्तरता दिँदै आएको जनाएको छ।

३२ वर्षदेखि बैंकिङ सेवा दिँदै आएको महालक्ष्मी विकास बैंकले हालै काठमाडौंको ज्ञानेश्वरमा कफी लाउञ्जसहितको डिजिटल हबसमेत सञ्चालनमा ल्याएको छ। बैंकले प्रविधिमैत्री बैंकिङ सेवासँगै ग्राहक अनुभवलाई थप सहज बनाउनेतर्फ जोड दिँदै आएको जनाएको छ।