काठमाडौँ। नेपाल बीमा प्राधिकरणले आगामी माघ १ गतेदेखि बीमा क्षेत्रका सबै प्रकारका भुक्तानी अनिवार्य रूपमा विद्युतीय भुक्तानी प्रणालीमार्फत गर्न निर्देशन जारी गरेको छ।

प्राधिकरणले जीवन, निर्जीवन, लघु बीमा, पुनर्बीमा कम्पनी तथा बीमा दलालहरूलाई अबदेखि बीमालेख धारक, सेवा प्रदायक वा कर्मचारीलाई दिने भुक्तानी सीधै बैंक खातामा जम्मा हुने गरी व्यवस्था मिलाउन भनेको छ।

सम्पत्ति शुद्धीकरण निवारण निर्देशन–२०८२ ले दाबी भुक्तानी बीमालेख वा कानुनअनुसार भुक्तानी पाउने व्यक्तिको बैंक खातामै पठाउनुपर्ने प्रावधान राखेको उल्लेख गर्दै प्राधिकरणले उक्त नीति कार्यान्वयनलाई कडाई गर्न लागेको जनाइएको छ।

नेपाल सरकारले सार्वजनिक निकायका सबै भुक्तानी डिजिटल माध्यमबाट अनिवार्य गर्ने व्यवस्था लागू गरिसकेका सन्दर्भमा बीमा क्षेत्रमा पनि पूर्ण रूपमा इलेक्ट्रोनिक भुक्तानी प्रणाली लागू गरिने बताइएको छ।

यसअघि पनि प्राधिकरणले बीमा कम्पनीका स्थायी, अस्थायी, करार तथा ज्यालादारी कर्मचारीलाई पारिश्रमिक भुक्तानी बैंक खातामार्फत गर्ने व्यवस्था अनिवार्य गरिसकेको थियो।

प्राधिकरणका कार्यकारी निर्देशक तथा प्रवक्ता सुशील देव सुवेदीका अनुसार नीतिगत कदमले बीमा क्षेत्रमा पारदर्शिता, उत्तरदायित्व तथा वित्तीय अनुशासन बढ्ने अपेक्षा गरिएको छ।