काठमाडौं । विश्व स्वास्थ्य संगठन (डब्लुएचओ) ले गजा क्षेत्रबाट गरिँदै आएको बिरामीहरूको स्वास्थ्य उद्धार कार्य तत्कालका लागि स्थगित गरेको छ । संयुक्त राष्ट्र संघको यस एजेन्सीका लागि कार्यरत एक कर्मचारीको घटनामा मृत्यु भएपछि यो निर्णय लिइएको हो ।

विश्व स्वास्थ्य संगठनका प्रमुख टेड्रोस अधानोम गेब्रेयससले एक विज्ञप्ति जारी गर्दै आफ्ना सहकर्मीको मृत्यु भएकोमा गहिरो दुःख व्यक्त गरेका छन् । उक्त घटना हुँदा संगठनका अन्य दुई कर्मचारी पनि घटनास्थलमा भए तापनि उनीहरूलाई कुनै चोटपटक नलागेको उनले बताएका छन् ।

टेड्रोसले भने, ‘यस घटनापछि गाजाबाट राफाह नाका हुँदै इजिप्टतर्फ गरिने बिरामीको उद्धार कार्य अर्को सूचना नभएसम्मका लागि स्थगित गरिएको छ ।’ गाजाको स्वास्थ्य प्रणाली पूर्ण रूपमा ध्वस्त भएको अवस्थामा गम्भीर बिरामी र घाइतेहरूलाई जीवनरक्षाका लागि विदेशमा विशेषज्ञ उपचार गराउन लगिने प्रक्रियालाई मेडिकल इभ्याकुएसन भनिन्छ । हाल यो प्रक्रिया रोकिएपछि सयौं बिरामीको ज्यान जोखिममा परेको छ ।

१,७०० भन्दा बढी स्वास्थ्यकर्मीको मृत्यु

अल जजीराले गजाको स्वास्थ्य मन्त्रालयलाई उद्धृत गर्दै जनाए अनुसार, अक्टोबर २०२३ मा युद्ध सुरु भएदेखि हालसम्म गजामा १७०० भन्दा बढी स्वास्थ्यकर्मीहरू मारिएका छन् । जसमा डाक्टर, नर्स र प्यारामेडिक्सहरू रहेका छन् । गेब्रेयससले स्वास्थ्यकर्मी र सर्वसाधारणको सुरक्षाको माग गर्दै शान्ति नै उत्तम ओखती भएको बताएका छन् ।

इजरायली आक्रमणमा थप १० जनाको मृत्यु

यसैबीच, मध्य गजाको मगाजी शरणार्थी शिविर र विस्थापित प्यालेस्टिनीहरू बसिरहेको एक विद्यालय नजिकै भएको इजरायली बमबारीमा कम्तीमा १० जनाको मृत्यु भएको छ । अल–अक्सा शहीद अस्पतालले दिएको जानकारी अनुसार, इजरायली गोलाबारी र भिडन्तमा दर्जनौं मानिस घाइते भएका छन् । जसमध्ये ६ जनाको अवस्था गम्भीर छ ।

प्रत्यक्षदर्शीका अनुसार इजरायली ड्रोनले दुईवटा मिसाइल प्रहार गर्दा धेरै मानिसहरू हताहत भएका हुन् । गजामा जारी द्वन्द्व र स्वास्थ्य संरचनामाथिको आक्रमणले त्यहाँको मानवीय संकट झनै भयावह बन्दै गएको छ । एएनआई