काठमाडौं । महालक्ष्मी विकास बैंकले अन्तर्राष्ट्रिय स्तरको प्रतिष्ठित सम्मान प्राप्त गरेको छ। ग्राहकलाई आधुनिक, सुरक्षित र सहज बैंकिङ सेवा उपलब्ध गराउँदै आएको बैंकलाई भारतको इन्डियन चेम्बर अफ कमर्स (आईसीसी), कोलकाताले ‘राइजिङ स्टार–ग्रोथ’ विधाअन्तर्गत सम्मान प्रदान गरेको हो।

उक्त सम्मान जुलाई २४, २०२६ मा भारतको नयाँ दिल्लीमा आयोजित ‘चौथो इमर्जिङ एसिया बैंकिङ कन्क्लेभ एन्ड अवार्ड्स’ कार्यक्रममा प्रदान गरिएको थियो। बिमस्टेक क्षेत्रकै प्रतिष्ठित मानिने यस कार्यक्रममा भारत, नेपाल, श्रीलंका, म्यानमार र बंगलादेशका बैंकहरूको सहभागिता रहेको थियो।

बैंकले डिजिटल बैंकिङ सेवाको विस्तार, नवीन वित्तीय उत्पादनको विकास, व्यवसाय विस्तार, वित्तीय पहुँच अभिवृद्धि तथा उत्तरदायी बैंकिङ अभ्यासमा उल्लेखनीय योगदान पुर्‍याएबापत उक्त अवार्ड प्राप्त गरेको जनाएको छ। बैंकका अनुसार यस सम्मानले अन्तर्राष्ट्रिय क्षेत्रमा आफ्नो पहिचान र विश्वसनीयता थप मजबुत बनाउन सहयोग पुग्ने विश्वास लिइएको छ।

यो लगातार दोस्रो वर्ष हो, जब महालक्ष्मी विकास बैंकले इन्डियन चेम्बर अफ कमर्सबाट सम्मान प्राप्त गरेको छ। गत वर्ष बैंकले ‘एसेट क्वालिटी’ (सम्पत्ति गुणस्तर) विधाअन्तर्गत अवार्ड हासिल गरेको थियो।

‘सबल बैंक, सफल सहकार्य’ भन्ने नारालाई आत्मसात गर्दै आएको महालक्ष्मी विकास बैंकले देशभर गुणस्तरीय वित्तीय सेवा विस्तार गरिरहेको छ। यसैक्रममा बैंकले हालै काठमाडौं महानगरपालिका–३०, ज्ञानेश्वरमा कफी लाउञ्जसहितको डिजिटल हब सञ्चालनमा ल्याएको छ, जहाँ ग्राहकले आधुनिक डिजिटल बैंकिङ सेवा सहज रूपमा उपयोग गर्न सक्नेछन्।