काठमाडौं । एनएमबि बैंक लिमिटेडको अगुवाइमा मनाङमा निर्माणाधीन ६५ मेगावाट क्षमताको दुध खोला जलविद्युत आयोजनाको वित्तीय व्यवस्थापन भएको छ ।

दुध खोला हाइड्रो पावर कम्पनी प्रालिले प्रवद्र्धन गरिरहेको उक्त आयोजनाको कुल अनुमानित लागत १२ अर्ब ९० करोड रुपैयाँ रहेको छ । आयोजनामा बैंक तथा वित्तीय संस्थाले ९ अर्ब ६७ करोड रुपैयाँ ऋण लगानी गर्ने भएका छन् ।

आयोजनामा एनएमबि बैंक अगुवा बैंक र सानिमा बैंक सह–अगुवा बैंकका रूपमा रहेका छन् । आयोजनाको प्रमुख लगानीकर्तामा माउण्टेन इनर्जी नेपाल लिमिटेड तथा सीताराम तिमिल्सिनाको समूह रहेको कम्पनीले जनाएको छ ।

वित्तीय व्यवस्थापनसम्बन्धी ऋण सम्झौतामा एनएमबि बैंकका तर्फबाट सहायक महाप्रबन्धक दिनेश दुलाल र दुध खोला हाइड्रो पावर कम्पनीका तर्फबाट अध्यक्ष अरुण केसीले हस्ताक्षर गरेका छन् ।

एनएमबि बैंकले जलविद्युत क्षेत्रमा लगानी विस्तार गर्दै आएको छ । बैंकका अनुसार हालसम्म ५० भन्दा बढी जलविद्युत आयोजनामा लगानी गरिसकेको छ ।

बैंकले नेपाल राष्ट्र बैंकद्वारा जारी वातावरणीय तथा सामाजिक जोखिम व्यवस्थापनसम्बन्धी निर्देशिका, २०२२ अनुरूप वातावरणीय तथा सामाजिक नीति तथा व्यवस्थापन प्रणाली कार्यान्वयन गर्दै आएको जनाएको छ ।

दुध खोला आयोजनाको वातावरणीय, सामाजिक तथा सुशासनसम्बन्धी पक्षको अध्ययन तथा मूल्याङ्कनसमेत गरिएको बैंकले जनाएको छ । अन्तर्राष्ट्रिय असल अभ्यासअनुसार अन्तर्राष्ट्रिय वित्त निगम (IFC) द्वारा विकसित प्रारम्भिक वातावरणीय तथा सामाजिक परीक्षणसम्बन्धी उपकरण प्रयोग गरी आयोजनाको मूल्याङ्कन गरिएको हो ।

एनएमबि बैंकका अनुसार बैंकले हाल देशभर १९८ शाखा, १७६ एटिएम र ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ ।