• एमजीको सबैभन्दा ठूलो, शक्तिशाली र प्रिमियम एसयूभी नेपालमा सार्वजनिक — नाइमा मोबिलिटी एक्स्पो विशेष अफरअन्तर्गत रु. १५ लाख ५० हजारसम्मका फाइदा

काठमाडौं । गो अटोमोबाइल्स प्रालिले नाइमा नेपाल मोबिलिटी एक्स्पो २०२६ मा एमजीको नयाँ प्रिमियम एसयूभी एमजी म्याजेस्टर सार्वजनिक गरेको छ।

जेएसडब्ल्यू एमजी मोटरको नेपालका लागि आधिकारिक वितरक गो अटोमोबाइल्सले काठमाडौंको भृकुटीमण्डपमा जारी एक्स्पोमार्फत म्याजेस्टर नेपाली बजारमा सार्वजनिक गरेको हो। कम्पनीका अनुसार यो नेपालमा सार्वजनिक गरिएको एमजी ब्रान्डको हालसम्मकै ठूलो, शक्तिशाली र प्रिमियम एसयूभी हो।

म्याजेस्टर भारतको पहिलो डी+ श्रेणीको एसयूभी भएको कम्पनीको दाबी छ। परम्परागत पूर्ण आकारका एसयूभीभन्दा माथिल्लो श्रेणीमा राखिएको यस गाडीलाई भारतबाहिर प्रारम्भिक रूपमा उपलब्ध हुने बजारमध्ये नेपाल पनि एक रहेको कम्पनीले जनाएको छ।

२.० लिटर ट्विन–टर्बो डिजेल इन्जिन

एमजी म्याजेस्टरमा २.० लिटर ट्विन–टर्बो डिजेल इन्जिन प्रयोग गरिएको छ। उक्त इन्जिनले २१५.५ पीएस शक्ति र ४७८.५ एनएम टर्क उत्पादन गर्ने कम्पनीले जनाएको छ।

इन्जिनलाई ८–गियर स्वचालित गियरबक्ससँग जोडिएको छ। गाडी ४×२ र ४×४ दुवै विकल्पमा उपलब्ध हुनेछ।

५ मिटरभन्दा बढी लम्बाइ, २ मिटरभन्दा बढी चौडाइ र करिब १.९ मिटर उचाइ रहेको म्याजेस्टरमा २१९ मिलिमिटरको ग्राउन्ड क्लियरेन्स छ। यसमा २६५/५५ आर१९ आकारका सबै भूभागमा चल्न सक्ने टायर प्रयोग गरिएको छ।

अफ–रोड क्षमतामा पनि जोड

म्याजेस्टरमा १० वटा अफ–रोड ड्राइभिङ मोड उपलब्ध छन्। बालुवा, हिउँ, हिलो र चट्टानलगायत विभिन्न भूभागका लागि छुट्टाछुट्टै ड्राइभिङ मोड उपलब्ध रहेको कम्पनीले जनाएको छ।

यसमा अगाडि, बीच र पछाडिसहित तीनवटा डिफरेन्सियल लक तथा ८१० मिलिमिटरसम्म पानी पार गर्न सक्ने क्षमता रहेको छ।

६ र ७ सिटको विकल्प

म्याजेस्टरको भित्री भागमा ६ र ७ सिटको विकल्प उपलब्ध छ। ६ सिटे संस्करणमा दोस्रो पङ्क्तिमा कप्तान सिट राखिएको छ।

अगाडिका सिटमा मसाज र भेन्टिलेसन सुविधा, मनोरम काँचको छाना तथा १२.३ इन्चको ठाडो सूचना तथा मनोरञ्जन प्रणालीको पर्दा उपलब्ध छ।

कम्पनीका अनुसार गाडीमा ७५ भन्दा बढी जडित सवारी सुविधा छन्। टाढाबाट गाडी नियन्त्रण गर्ने, आवाजबाट आदेश दिने तथा स्मार्ट सूचना प्राप्त गर्नेलगायतका सुविधा यसमा समावेश छन्।

 

सुरक्षामा लेभल–२ एडीएएस

सुरक्षातर्फ म्याजेस्टरमा ६ वटा एयरब्याग, लेभल–२ उन्नत चालक सहायता प्रणाली (एडीएएस), ३६० डिग्री क्यामेरा र विद्युतीय पार्किङ ब्रेकलगायतका सुविधा छन्।

गो अटोमोबाइल्सले गाडीसँग ५ वर्ष वा १ लाख किलोमिटरसम्मको वारेन्टी उपलब्ध गराउने जनाएको छ। साथै, नेपालभर २४ घण्टा, सातै दिन सडक सहायता सेवा उपलब्ध हुने कम्पनीको भनाइ छ।

एक्स्पोमा १५ लाख ५० हजारसम्मको मूल्य लाभ

नाइमा मोबिलिटी एक्स्पो २०२६ लाई लक्षित गर्दै कम्पनीले म्याजेस्टर खरिद तथा बुकिङ गर्ने ग्राहकका लागि विशेष अफर सार्वजनिक गरेको छ।

कम्पनीका अनुसार ग्राहकले ८ लाख रुपैयाँसम्मको निश्चित नगद छुट, एक वर्षको व्यापक बीमा तथा प्रिमियम सामग्री निःशुल्क प्राप्त गर्नेछन्। साथै, १० हजार रुपैयाँभन्दा बढीको बुकिङ गर्ने ग्राहकलाई उपहार प्याकेज र प्रत्येक बुकिङकर्तालाई सामसङ ग्यालेक्सी एस२६ अल्ट्राको उपहार चिठ्ठामा सहभागी हुने अवसर दिइनेछ।

यी सबै सुविधाको कुल मूल्य लाभ १५ लाख ५० हजार रुपैयाँसम्म पुग्ने कम्पनीले जनाएको छ।

सेवा सञ्जाल विस्तारमा जोड

गो अटोमोबाइल्सले काठमाडौंको धोबीघाटमा समर्पित एमजी सेवा केन्द्र सञ्चालन गरिरहेको जनाएको छ। कम्पनीले नेपालभर सेवा केन्द्रको सञ्जाल विस्तार गरिरहेको र स्पेयर पार्ट्स तथा प्रशिक्षित प्राविधिकको उपलब्धता सुनिश्चित गर्ने बताएको छ।

गो अटोमोबाइल्सका प्रबन्ध निर्देशक आकाश गोल्छाका अनुसार कम्पनीको लक्ष्य नेपालमा गाडी बिक्रीमा मात्र सीमित नभई एमजी ग्राहकका लागि बिक्रीपछिको सेवा र सहयोगसहितको पूर्ण सेवा प्रणाली निर्माण गर्नु हो।

नाइमा नेपाल मोबिलिटी एक्स्पो २०२६ काठमाडौंको भृकुटीमण्डपमा आयोजना भइरहेको छ, जहाँ एमजी म्याजेस्टरलाई कम्पनीले आफ्नो नयाँ प्रिमियम एसयूभीका रूपमा प्रदर्शनीमा राखेको छ।