काठमाडौं । नेपालमा विद्युतीय सवारीसाधनको बढ्दो लोकप्रियतालाई ध्यानमा राख्दै एमएडब्लू वृद्धिले दिपल एस०७ एल सार्वजनिक गरेको छ। कम्पनीले आफ्ना लोकप्रिय इलेक्ट्रिक एसयूभीहरूको लाइनअपमा थपिएको यो अत्याधुनिक र शक्तिशाली एसयूभीलाई विशेष समारोहबीच बजारमा उतारेको हो।

सार्वजनिक समारोहमा दिपलका ब्रान्ड एम्बेसडर पारस खड्का, एमएडब्लू ग्रुपका अध्यक्ष विष्णु कुमार अग्रवाल, र एमएडब्लू वृद्धि अटोकर्पका प्रबन्ध निर्देशक विवेक सिकारियाले सहभागिता जनाएका थिए। दिपल एस०७ एललाई अत्याधुनिक प्रविधि र फ्युचरिस्टिक डिजाइनसहित उपभोक्ताको आवश्यकतालाई ध्यानमा राखेर प्रस्तुत गरिएको छ।

पर्फमेन्स र विशेषताहरू

दिपल एस०७ एलमा उल्लेखनीय सुधार गरिएको छ। यो १६० किलोवाटको रियर ह्विल ड्राइभ मोटरसहित आउँछ, जसले ७९.९ किलोवाट आवरको ब्याट्री प्याक प्रयोग गर्दछ। यसले सिंगल चार्जमा ४८५ किलोमिटरको डब्लुएलटीपी रेन्ज प्रदान गर्ने क्षमता राख्दछ। तीव्र गतिको अनुभवका लागि यो गाडीले ० देखि १०० किलोमिटर प्रति घन्टा रफ्तार ६.६ सेकेन्डमा हासिल गर्न सक्छ भने यसको अधिकतम गति १८० किलोमिटर प्रति घन्टा रहेको छ।

प्रविधि र सुविधा

फ्युचरिस्टिक डिजाइनको विशेषतासहित एसयूभीमा फ्रेमलेस डोर र २० इन्चका ठूला टायरहरू प्रयोग गरिएका छन्। इन्टेरियरमा १५.६ इन्चको सनफ्लावर टचस्क्रिन छ, जसमा क्वालकम स्न्यापड्रागन ८१५५ चिप जडान गरिएको छ। यसले उत्कृष्ट इन्फोटेनमेन्ट अनुभव र गाडीको कन्ट्रोललाई सहज बनाउनेछ।

स्मार्ट ड्राइभिङलाई नयाँ उचाइमा पुर्याउन एस०७ एलमा अग्मेन्टेड रियालिटी हेडअप डिस्प्ले, जेस्चर कन्ट्रोल, वेलकम सिट, र एडास २.५ प्रविधि उपलब्ध छन्।

सुरक्षा विशेषता

सुरक्षालाई उच्च प्राथमिकता दिँदै गाडीमा एआईसीसी एडाप्टिभ क्रुज कन्ट्रोल, एक्टिभ इमर्जेन्सी ब्रेकिङ, ब्लाइन्ड स्पट मोनिटरिङ, र ३६० डिग्री प्यानोरामिक क्यामेराजस्ता विशेषता समावेश गरिएको छ।

मूल्य र विशेष अफर

दिपल एस०७ एलको मूल्य ८४ लाख ९९ हजार रुपैयाँ तोकिएको छ। हाल कम्पनीले १५ दिनसम्मका लागि ३ लाख रुपैयाँ छुटको अफर दिएको छ। यसरी ग्राहकहरूले यो इलेक्ट्रिक एसयूभी ८१ लाख ९९ हजार रुपैयाँमै खरिद गर्न सक्नेछन्।

लोकप्रियता र भविष्यको दृष्टिकोण

दिपल एस०७ को सफलताले कम्पनीलाई थप उर्जा दिएको छ। सात सयभन्दा बढी युनिट बिक्री भइसकेको यो मोडेलको नयाँ संस्करणले पनि प्रदर्शन, रेन्ज, र ड्राइभिङको आनन्दलाई नयाँ स्तरमा पुर्याउने अपेक्षा गरिएको छ। एमएडब्लू वृद्धिका अनुसार दिपल एस०७ एलले उपभोक्तालाई अद्वितीय ईभी अनुभव प्रदान गर्नेछ।