काठमाडौं । सरकारले दक्षिण कोरियाका लागि जारी गर्दै आएको ‘नो अब्जेक्सन लेटर’ (एनओसी) स्थगन गरेको छ । शिक्षा, विज्ञान तथा प्रविधि मन्त्रालयले अर्काे व्यवस्था नभएसम्म एनओसी जारी गर्न रोकेको हो ।

कोरियामा अध्ययन गर्ने नेपाली विद्यार्थीहरूले दुःख पाएको गुनासो व्यापक रूपमा आएपछि तत्कालका लागि स्थगन गरिएको हो । मन्त्रालयका सूचना अधिकारी नीलकण्ठ ढकालका अनुसार तत्कालका लागि एनओसी जारी गर्न स्थगन गरिएको बताए ।

गुनासो आउने थालेपछि परराष्ट्र मन्त्रालयले कोरियास्थित नेपाली राजदूतावाससँग नेपाली विद्यार्थीहरूको अवस्थाबारे जानकारी माग गरेको थियो । दूतावासले नेपाली विद्यार्थीको अवस्था र उनीहरूले पाउने डी–२ र डी–४ भिसाका विषयमा जानकारी गराएको थियो । दूतावासले कोरियामा दिनानुदिन नेपाली विद्यार्थीहरू समस्याग्रस्त हुँदै गएको जनाएको छ ।

विषेशगरी कोरियामा अण्डरग्रेजुएट अध्ययनका लागि जाने विद्यार्थीहरू डी–२ र डी–४ भिसामार्फत जाने गरेका छन् । डी–२ भिसामा आउनेहरू कोरिया पुगेर सिधै आफूले पढ्न चाहेको विश्वविद्यालय र कोर्समा भर्ना हुने गरेको दूतावासले जनाएको छ ।

विद्यार्थीलाई कन्सल्टेन्सीहरूले जानेवित्तिकै अवैधानिक रूपमा भएपनि काम गर्न पाइन्छ भनेर आश्वासन बाँड्ने गरेको र विद्यार्थीहरूले पढाइमा भन्दा काममा बढी ध्यान दिने गरेको दूतावासको भनाइ छ ।