काठमाडौं । आयु इन्टरटेन्मेन्ट लिमिटेडले पर्यटकीय नगरी पोखरामा अवस्थित फिस्टेल ड्रिम पार्कका लागि सर्वसाधारणलाई जारी पूँजीको २० प्रतिशत बराबरको शेयर प्रति शेयर रु. १०० अंकित मूल्यमा आईपीओ निष्काशन गर्ने भएको छ। कम्पनीले ३०,००,००० कित्ता शेयर निष्काशनका लागि नेपाल लाइफ क्यापिटल लिमिटेडलाई निष्काशन तथा बिक्री प्रबन्धकको रूपमा नियुक्त गरेको छ।

शेयर निष्काशन तथा बिक्री प्रबन्धक नियुक्ति सम्बन्धी सम्झौता मंसिर ०३ गते, बुधवार, नेपाल लाइफ क्यापिटल लिमिटेड, कमलपोखरीस्थित कार्यालयमा सम्पन्न भएको थियो। सम्झौतापत्रमा आयु इन्टरटेन्मेन्ट लिमिटेडका तर्फबाट अध्यक्ष श्री कदम के.सी. र नेपाल लाइफ क्यापिटल लिमिटेडका तर्फबाट प्रमुख कार्यकारी अधिकृत श्री मनिष घिमिरेले हस्ताक्षर गर्नुभएको छ।

सारथी ग्रुप लगायतका अन्य लगानीकर्ताको सहभागिता रहेको फिस्टेल ड्रिम पार्कमा देशका प्रतिष्ठित उद्यमीहरू र पोखरा क्षेत्रका पर्यटन व्यवसायीहरूको पनि लगानी रहेको छ। करिब ५७ रोपनी क्षेत्रफलमा फैलिएको यो पार्क सबै उमेर समूहका व्यक्तिहरूका लागि उपयुक्त मनोरञ्जनस्थलको रूपमा विकसित गरिएको छ।

फिस्टेल ड्रिम पार्कमा वाटर पार्क, वेब पुल, साहसिक गतिविधि (एड्भेञ्चर) लगायतका विविध मनोरञ्जन सुविधाहरू उपलब्ध छन्। कम्पनीले यसलाई नेपालकै सबैभन्दा ठूलो मनोरञ्जन पार्कका रूपमा विकास गरेको जनाएको छ।

नेपाल लाइफ इन्स्योरेन्स कम्पनी लिमिटेडको सहायक कम्पनी नेपाल लाइफ क्यापिटल लिमिटेड धितोपत्र बोर्डबाट लगानी व्यवस्थापन, धितोपत्र प्रत्याभूति (अन्डरराइटिङ), निक्षेप सदस्य सेवा, योजना व्यवस्थापन, डिपोजिटरी सेवा, संस्थागत परामर्श, शेयर रजिष्ट्रेशन, तथा निष्काशन र बिक्री प्रबन्धन सम्बन्धी सेवा प्रदान गर्न अनुमति प्राप्त मर्चेन्ट बैंकिङ संस्था हो।