फेरि जारी गर्यो लक्ष्मी बैंकले दोस्रोपटक ऋणपत्र, ब्याज दर ८.५ प्रतिशत, १० वर्षपछि हुन्छ परिपक्व
Sunday Jul 04, 2021
वि.सं.२०७८ असार २० आइतवार १०:२१
काठमाडौं। लक्ष्मी बैंकले पनि ऋणपत्र निष्कासन गर्ने प्रक्रिया अगाडि बढाएको छ। बैंकले असार २८ गतेबाट ३१ गतेसम्म ऋणपत्र निष्कासन गर्ने भएको छ।
बैंकले १० वर्ष अवधिको ऋणपत्रमा वार्षिक साढे ८ प्रतिशत ब्याज दिने छ। ब्याज प्रत्येक ६/६ महिनामा भुक्तानी हुने छ। साँवा भने २०८८ सालमा परिपक्व भएपछि भुक्तानी गरिने छ।
कम्पनीले कुल २ अर्ब रुपैयाँको ऋणपत्र जारी गर्न लागेको हो। यसमा कम्तिमा २५ कित्ता र बढीमा एक लाख कित्ताका लागि आवेदन दिन सकिन्छ।
कम्पनीले २ अर्बमध्ये ८० करोड ऋणपत्र सर्वसाधारणलाई छुट्याएको छ। यसैबाट ४० हजार कित्ता सामूहिक लगानी कोषले पनि पाउने छन्। बाँकी रहेको एक अर्ब २० करोड रुपैयाँको ऋणपत्र विभिन्न संघसंस्थाहरुलाई बिक्री गरिने छ।
बैंकले दुई वर्षअघि पनि २ अर्बको ऋणपत्र जारी गरेको थियो। अबको ८ वर्षपछि यो परिपक्व हुने छ। यसको ब्याज भने १० प्रतिशत छ।
