३१ बैशाख, काठमाण्डौँ-   स्थानीय निर्वाचनमा प्रमुख आकर्षणको केन्द्र काठमाडौँ महानगरपालिका र ललितपुर महानगरको मतगणना आजैबाट सुरु गरिने भएको छ ।

मतगणनाका लागि निर्वाचन सकिएलगत्तै काठमाडौँ महानगरका ३२ वटै वडाबाट मतपेटिका प्रदर्शनीमार्गस्थित राष्ट्रिय सभागृहमा ल्याउने क्रम सुरु भएको हो ।

जिल्ला निर्वाचन कार्यालयका अनुसार ३२ वटै वडाको मतपेटिकाहरु राष्ट्रिय सभागृहमा ल्याउने क्रम जारी छ । निर्वाचन अधिकृतको कार्यालय एउटा वडाको मतपेटिका खोलेर त्यो मत गनिसकेपछि मात्रै अर्को वडाको मतपेटिका खोल्ने भएको छ ।

निर्वाचन कार्यालयले ललितपुर महानगरसहित भक्तपुरका सबै नगरको मतगणना पनि आजै गर्ने भएको छ । मतपेटिका आइसक्ने सबै स्थानको मतगणना आजै थाल्न दबाब परेपछि निर्वाचन आयोगले यस्तो कदम चालेको हो ।