सेयर बजारले बनायो थप किर्तिमान,१० कम्पनीका लगानीकर्ताको भयो आज चाँदी कटाई
Thursday Aug 12, 2021
वि.सं.२०७८ साउन २८ बिहीवार १७:५८
काठमाडौँ । सेयर बजारले फेरि नयाँ कीर्तिमान बनाएको छ । विकास बैंकको सेयरमा उछाल आउँदा नेप्सेले आज नयाँ रेकर्ड बनाएको हो ।
आज नेप्सेले ३१७८ विन्दु चुम्दै इतिहासकै सर्वाधिक उच्च विन्दुको रेकर्ड बनाएको हो । नेप्से ३१७५ विन्दु माथि पुगेको इतिहासमै पहिलोपटक हो । यसअघि बुधबार मात्रै नेप्सेले इतिहासकै सर्वाधिक ३१६२ विन्दुको रेकर्ड बनाएको थियो ।
सूचकले नयाँ रेकर्ड बनाएको दिन कारोबार रकममा पनि उछाल आएको छ । अघिल्लो दिनको तुलनामा कारोबार रकम २ अर्बले बढेर साढे १७ अर्ब नाघेको छ ।
आज सेयर बजार मापक सूचक नेप्से १६.३२ अंकले बढेर ३१७८.९१ विन्दुमा पुगेको छ । नेपाल स्टक एक्सचेन्जका अनुसार आज २२५ कम्पनीको १७ अर्ब ७१ करोड ३२ लाख ७६ हजार ११५ रुपैयाँ बराबरको ३ करोड ६६ लाख ८ हजार ४६१ कित्ता सेयर किनबेच भएका छन् ।
आज कारोबारमा आएका १३ वटा समूहमध्ये ७ समूहको परिसूचकमा हरियाली छाएको छ ६ समूहको परिसूचक राताम्मे भएका छन् । विकास बैंक समूह सबैभन्दा धेरै ६.३७ प्रतिशतले बढेको छ भने व्यापार समूह १.५१ प्रतिशतले घटेको छ ।
आज कारोबारमा आएका २२५ कम्पनीमध्ये ११२ कम्पनीको सेयर मूल्य बढेको छ भने १०४ कम्पनीको मूल्यमा गिरावट आएको छ । ९ कम्पनीको मूल्य स्थिर रहेको छ ।
आज पनि माथिल्लो तामाकोशीकोे सर्वाधिक कारोबार भएको छ । यसको साढे ६२ करोड रुपैयाँ बढीको कारोबार भएको छ । कारोबार रकमकै आधारमा कामना सेवा विकास बैंक ५८ करोड र साइन रेसुंगा डेभलपमेन्ट बैंक ४८ करोडको कारोबार सहित शीर्ष तीन स्थानमा रहे ।
दोहोरो अंकले बढेको बजारमा आज ७ कम्पनीको सेयर मूल्य पोजेटिभ सर्किट लागेको छ । महालक्ष्मी, साइन रेसुंगा, कामना सेवा विकास बैंक, रुरु जलविद्युत्, माउन्टेन इनर्जी र जीवन विकास लघुवित्तको सेयर मूल्य ठ्याक्कै १० प्रतिशतले बढेको छ ।
यस्तै, युनियन लाइफ इन्स्योरेन्सको सेयर मूल्य करिब १० प्रतिशतले बढेको छ । यसैगरी, श्री इन्भेटमेन्ट, रैराङ हाइड्रोपावर र सांग्रिला डेभलपमेन्ट बैंकका सेयरधनीले पनि ७ प्रतिशतभन्दा धेरै कमाएका छन् ।
बढ्दो बजारमा आज पाँचथर पावर कम्पनीका लगानीकर्ताले भने सबैभन्दा धेरै ३.९९ प्रतिशत गुमाएका छन् ।