तरलता अभावका बाबजूद बैंकहरुले आक्रमक रुपमा कर्जा विस्तार गरेका छन् । साउन यता बैंकिङ प्रणालीमा तरलता अभाव चुलिए पनि बैंकहरु उल्लेख्य रुपमा कर्जा विस्तार गर्न सफल भएका हुन् ।

भदौ महिनामा मात्र वाणिज्य बैंकहरुले १ खर्ब बढी ऋण लगानी गरेका छन् । नेपाल बैंकर्स संघका अनुसार भदौको ५ सातामा बैंकहरुले १ खर्ब ८ अर्ब ऋण लगानी गरेका छन् । बैंकहरुले हरेक हप्ता कर्जा विस्तार बढाउँदै लगेको छन् ।

भदौ पहिलो साता १४ अर्ब कर्जा लगानी गरेका बैंकहरुले दोस्रो साता १९ अर्ब, तेस्रो साता २२ अर्ब, चौथो साता २५ अर्ब र पाँचौं साता २८ अर्ब ऋण लगानी गरेका छन् ।
पछिल्लो समय कोरोना संक्रमण कम भएसँगै समग्र अर्थतन्त्र चलायमान हुँदा ऋणको माग ह्वात्तै बढेको बैंकहरुले बताएका छन् । ऋणको माग उच्च भए पनि माग अनुसार ऋण उपलब्ध गराउन कठिन हुँदै गएको उनीहरुको भनाइ छ ।

तरलता अभावका कारण असोजका लागि बैंकहरुले निक्षेप र कर्जाको ब्याज समेत बढाएका छन् । बैंकहरुले मुद्दती निक्षेपमा १० प्रतिशतसम्म ब्याज दिन थालेका छन् भने कर्जाको पनि दोहोरो अंकमा पुगेको छ । पछिल्लो समय बैंकहरुले अन्तर बैंक र राष्ट्र बैंकबाट सापटी लिएर कर्जा लगानी गर्दै आएका छन् ।

नेपाल राष्ट्र बैंकले मौद्रिक नीतिमार्फ सीसीडी व्यवस्था खारेज गरी सीडी व्यवस्था लागू गरेपछि बैंकिङ प्रणालीमा तरलता अभाव चुलिँदै गएको हो । साथै, पछिल्लो समय बजेट होलिडे हुन गई खर्च हुन नसक्दा तरलता अभाव झनै बढ्दै गएको छ ।

निक्षेप संकलन भने सुस्त

आक्रमक कर्जा विस्तार गरेका बैंकहरुको निक्षेप संकलन भने सुस्त देखिएको छ । बैंकर्स संघका अनुसार भदौमा १ खर्ब ८ अर्ब ऋण लगानी गरेका बैंकहरुले सोही अवधिमा जम्मा ४७ अर्ब निक्षेप संकलन गरेका छन् ।

भदौ पहिलो साता बैंकिङ प्रणालीबाट ७ अर्ब निक्षेप बाहिरिएको थियो भने त्यसपछि क्रमशः थपिएको छ । भदौ अन्तिम साता कर्जाकै हाराहारीमा निक्षेप संकलन गरे पनि अरु साता बैंकहरुले कर्जाको तुलनामा अत्यन्त न्यून निक्षेप संलन गरेका छन् ।

चालू आवको भदौ मसान्तसम्ममा बैंकहरुले कुल ४१ खर्ब ७१ अर्ब रुपैयाँ निक्षेप संकलन गरी ३८ अर्ब ७२ अर्ब रुपैयाँ कर्जा लगानी गरेका छन्।