थाहा पाउनु भो ? उपकार लघुवित्तको आइपीओ खुल्यो, अपि पावरको हकप्रद खुल्यो
Friday Apr 08, 2022
वि.सं.२०७८ चैत २५ शुक्रवार ०९:३७
उपकार लघुवित्त वित्तीय संस्थाले आज (कार्यालय समय)देखि प्राथमिक साधरण सेयर (आइपीओ) विक्री खुला गर्ने भएको छ। लघुवित्तले प्रतिकित्ता १०० रुपैयाँ दरले २ करोड ६६ लाख २५ हजार रुपैयाँ बराबरको २ लाख ६६ हजार २५० कित्ता सेयर विक्रीमा ल्याएको हो ।
निष्काशित कुल सेयरमध्ये ३ हजार २८१ कित्ता (०.५ प्रतिशत) लघुवित्तका कर्मचारी र ११ हजार ८१३ कित्ता (५ प्रतिशत) सामूहिक लगानी कोषहरुका लागि छुट्याइएको छ । बाँकी २ लाख २१ हजार १५६ कित्ताका लागि र्सवसाधरणले आवेदन दिन पाउने छन् ।
लघुवित्तको आइपीओमा चैत २९ गतेसम्म आवेदन दिन पाइने छ । सो अवधिमा सबै आइपीओ विक्री नभएमा ढिलोमा २०७९ वैशाख ९ गतेन पाउने छन् । लगानीकर्ताले न्यूनतम १० कित्तादेखि अधिकतम १ हजार कित्ताका लागि आवेदन दिन सक्नेछन्। लघुवित्तको आइपीओमा नेपाल धितोपत्र बोर्डबाट अनुमति प्राप्त सम्पूर्ण सी–आस्वा सदस्य बैंक तथा वित्तीय संस्था, तिनका शाखा कार्यालयका साथै मेरो सेयरको वेबसाइट र एपबाट आवेदन दिन सक्नेछन् ।
लघुवित्तको सेयर निष्काशन तथा विक्री प्रबन्धक नेपाल एसबीआई बैंकिङ्ग लिमिटेड रहेको छ। लघुवित्तको आइपीओलाई रेटिङ्ग एजेन्सी इक्रा नेपालले ‘इक्रा एनपी इस्युअर रेटिङ्ग डबल बी माइनस’ रेटिङ्ग दिएको छ । यसले लघुवित्तको दायित्व बहन गर्ने क्षमतामा मध्यम जोखिम रहेको संकेत गर्दछ।
धितोपत्र निष्काशन तथा बाँडफाँड नियमावली अनुसार सबै योग्य आवेदकलाई कम्तीमा १० कित्ताका दरले समानुपातिक हिसाबले आइपीओ बाँडफाँट गर्नुपर्ने हुन्छ।कम्पनीले सर्वसाधरणलाई २ लाख २१ हजार १५६ कित्ता छुट्याएको छ । सो आधाारमा प्रति आवेदकलाई १० कित्ताले बाँड्दा २२ हजार ११५ जनालाई मात्र सेयर दिन पुग्छ ।
यसअघि खुलेका आइपीओमा २६ लाख बढीले आवेदन दिँदै आएका छन् । सो आधारमा १० कित्ता पाउन पनि भाग्यकै भर पर्नुपर्ने देखिन्छ । त्यसअनुसार कम्पनीको आइपीओमा १ हजार रुपैयाँ अर्थात् १० कित्ताका लागि आवेदन दिनु उपयुक्त देखिन्छ ।
त्यस्तै अपि पावर कम्पनीले आजदेखि हकप्रद सेयर निष्काशन गर्ने भएको छ । कम्पनीले हाल कायम चुक्ता पूँजीको ३९.३६ प्रतिशत अर्थात् १ स्०.३९३६ अनुपातमा हकप्रद निष्काशन गरेको हो ।
कम्पनीले प्रतिकित्ता १०० रुपैयाँ दरले १ अर्ब ८ करोड ६० लाख रुपैयाँ बराबरको १ करोड ८ लाख ६० हजार कित्ता हकप्रद सेयर विक्रीमा ल्याएको हो ।
कम्पनीले हकप्रद प्रयोजनका लागि चैत १४ गते बुकक्लोज गरेको थियो । तसर्थ, चैत १३ गतेसम्म नेप्सेमा कारोबार भइ कायम रहने सेयरधनीले हकप्रदमा आवेदन दिन पाउनेछन् ।
कम्पनीको हकप्रदमा वैशाख १५ गतेसम्म आवेदन दिन पाइने छ । लगानीकर्ताले मुक्तिनाथ क्यापिटल, धितोपत्र बोर्डबाट सी आस्वा अनुमति प्राप्त बैंक तथा वित्तीय संस्थाका साथै मेरोसेयर मार्फत आवेदन दिन सक्नेछन् ।
साथै, मुक्तिनाथ विकास बैंकका इटहरी, पोखरा-नागढुङ्गा, नारायणगढ, सुर्खेट, नेपालगंज, धनगढी, विराटनगर र जनकपुर शाखा, ग्लोबल आइएमई बैंकका बैतडी, गोकुलेश्वर, दार्चुला, डडेलधुरा, महेन्द्रनगर, धनगढी र अत्तरीय शाखा कार्यालयबाट पनि आवेदन दिन सक्नेछन् ।
कम्पनीको हकप्रद सेयरको विक्री प्रबन्धक मुक्तिनाथ क्यापिटल लिमिटेड रहेको छ। कम्पनीको हकप्रदलाई क्रेडिट रेटिङ एजेन्सी केयर रेटिङ नेपालले ‘केयर एनपी बी प्लस आइएस’ रेटिङ दिएको छ । यसले कम्पनीको वित्तीय दायित्व पूरा गर्न जोखिममा रहेको संकेत गर्दछ ।हाल २ अर्ब ७५ करोड ८९ लाख चुक्ता पूँजी रहेको कम्पनीको हकप्रद निष्काशनपछि ३ अर्ब ८४ करोड ४९ लाख रुपैयाँ पुग्नेछ ।